Tawacult n tẓuri d yidles amaziγ irruḥ-as yiwen n ucennay gar icennayen iqburen i yebnan u yesnarni di tezlit taqbaylit deg iseggasen n 60 , wagi d Mustapha Aidjer. Isem-is aḥeqqani Bouhas Boukhalfa, illul deg useggas 1939 di taddart n Ḥura, taγiwant n Wizgan. Yunag γer tmurt n Fransa d ilemẓi, akken ad d-yessas aγrum-is. Yekcem annar n ccna di lγerba deg useggas 1960, u yufrar-d gar icennayen meqren n leqbayel i yellan di tallit-ni di lγerba, am Slimane Azam, Youcef Abdjaoui, Zerrouki Allaoua, Akli Yahyaten, Farid Ali…atg.
Aḍebsi amenzu yesekles-it di tezrigin Globo, di tmurt n Fransa di tezlitt-is mucaεen « Ddunit yebnan γef lḥif », anda i yecna γef tudert qessiḥen d wugguren n lγerba.
Mustapha Aidjer, d agrewliw, imi tamsalt n tmurt yettawi-tt deg wul, yeqdec aṭas γef tegrewla Tazzayrit di tmurt n Fransa. Tizlatin-is ttεadayent-d deg maṭṭaf wis 02 n Radyu n teqbaylit, u γas akken mbaεd timunent n tmurt n Lzzayer yeḥbes niqal ccna, maca akken id-tlul amaṭṭaf n Tilizri n BRTV deg aggur n yennayer deg seggas n 2000, Mustapha Aidjer yuγal-it-id wafud d usirem, yesekles deqs n les clips. Aseggas n 2003, yesekles yiwen n CD i yesεan azal n 08 n tezlatin. Γas akken Mustapha Aidjer yesεa tabγest d wafud i ccna maca tamettant n tmuṭṭut-is d mmi-s (2012 et 2013)thhuz-it tyita, yaγli-d deg aṭṭan, yekcem γer sbiṭar n miceli syen yuγal γer tmurt n Fransa, anda i yewweḍ laεfu Rebbi ass n 22 yennayer 2014, syen tamḍelt-is tella-d di taddart-is Ḥura di tγiwant n Wizgan, anda ḥedren deqs n yinaẓuren, icennayen d wid akk it-iḥemlen. Sgunfu di talwit.
Islam Bessaci