Deg tlemmast n ddurt yezrin ay tseqqef tfaska n tmucuha deg teẓrigt-is tis-ṭam (8) i d-tesuddus Tdukkla « imeɣri amecṭuḥ » n waɣir n Wehran s yiswi n usnerni n tɣuri n warrac. Ahil anesbaɣur (riche) n tfaska-a tagreɣlant yella-d s tallelt n CCF n Wehran ed Tlemsan akked Tidukkla n temnaḍt Awal ed Tirawt. Ttiɛad-a yessemlal-d aṭas d lǧens, ugar n 15 n yinalasen (conteurs) ay d-yerzan seg tmura yemxalafen n ddunit gar-asent: Lezzayer, Kungu, Cili, Taswist, Fransa, Lubnan, ed tiyaḍ. Seg yinalasen n Tmurt, yettekka yiwen n unalas i iruḥen sey-a seg Tmurt n Yizwawen, seg taddart n Ayt Smaɛel, wayi d ilemẓi Fares Idir, i yellan d amedyaz daɣen. Tafaska i yemuggen deg teɣzi n 6 wussan tewwi-d ayen akk yetturaǧan deg-s, ɣef tnaga n wid iḥeḍren i ttiɛad-a ladɣa deg rreḥba n Sidi Belɛebbas anida inalasen heggan-d ayen yecban asaru: ttɛeddayen s nnuba i usayes (scène) deg teɣzi n wakud n ugar 2 n yisragen (tisaɛtin) nutni d wid i d-yettawin timucuha-nsen yemxalafen, yal wa s yiles-is, s ssenf-is d uɣanib-is (style), d ayen i yeǧǧan azayez (public) Abelɛebbasan yeɛjeb-as lḥal mačči d kra drus, almi yufa iman-is yekcem s tehri deg umaḍal-a n usugen seg wakken cebbḥen tagnit yinaẓuren war attqelleq neɣ d lɣell ɣef telwiḥt-nni n usayes, acku ẓran dakken llan d inagan deg usiweḍ n tebraḍt i uḥraz n tgemmi timawit (patrimoine oral) d usemɣer deg ccan-is. Taggara n temdelt n tfaska-a ttwaɛerḍen-d yimferraǧen ad alin i tqaɛet akken ad zdin akud-nni yeččuren d iȟulfan akked yinalasen ed ad gen tiwlafin (photos).
Mhenni Xalifi