Accueil Tamazight D imyura i wumi d-iṣaḥ waraz Belɛid at Ɛli n useggas 2014

Ḥusin Luni, Muṛad Ḥaǧ Saɛid d Muḥend Aɛṛab ayt Qasi. : D imyura i wumi d-iṣaḥ waraz Belɛid at Ɛli n useggas 2014

1937
- PUBLICITÉ -

Am wakken i tewɛed yakan Tesbeddit Tiregwa wid akk ittekkan deg temsizzelt n tsekla i d-tesuddes seg wagur n yulyu 2013 ar wass n umenzu n yennayer 2014; dakken igemmaḍ ad ten-id-tessufeɣ ilmend n umulli wis 34 n “Tefsut Imaziɣen», deg 20 Yebril 2014. 

- PUBLICITÉ -

I waken ur d-tettili ara tucḍa deg usesmel n yigemmaḍ, Tasbeddit Tiregwa tesbedd-d yiwet n tesqamut n yinezrafen (comité d’avaluation) n 20 iɛeggalen anda deg-s llan  imnuda-isdawanen, imyura akked iselmaden n tmaziɣt seg 5 n tmura yemgarraden. Tasqamut-a tebda ad txeddem seg Yennayer 2014 alama d umalas amezzwaru n wayur n Yebril 2014. Yal yiwen ger iɛeggalen n Tesqamut n yinezrafen, yefka-d asegmeḍ ines. Syin akin Tasbeddit Tiregwa tga assegrew n yisselɣa (Collecte des données). Deg taggara  asesmel n yigemmaḍ n temsizzelt yeffeɣ-d am wakka: 

– Araz amezwaru (08 imelyan n ssuntim), yewwi-t Ḥusin Luni. 

– Araz wis sin (05 imelyan n ssuntim), yewwi-t Muṛad Ḥaǧ Saɛid. 

– Araz wis tlata (03 imelyan n ssuntim), yewwi-t Muḥend Aɛṛab ayt Qasi. 

Ayyuz i wid meṛṛa irebḥen. Ma d wid/tid ur d-neffiɣ ara tikkelt-a, Tasbeddit Tiregwa tessaram i waken ad uɣalen i tikkelt nniḍen deg weḥric wis 2 n temsizzelt Araz Belɛid At Ɛli ad yebdun isya ɣer kra n wayuren.

Tasbeddit Tiregwa tessufeɣ-d yiwen n wulɣu deg wesmel n temsizzelt: www.belaid.tiregwa.com, anda tfuṛes tagnit tesnemmer akk imyura ittekkin s tullisin-nsen di temsizzelt, terna daɣen tesnemmer wid meṛṛa i as-d-yefkan afus n tallelt ladɣa wid i d-yefkan tadrimt i yettwawesmen i wid d-yufraren. Iɛeggalen n Tesbeddit Tiregwa smektan-d daɣen deg wulɣu-nsen s yiswi i sɛan deg tlalit n waraz n tsekla Belɛid at Ɛli : “ D asebɣes n wid yettarun s tmaziɣt akken ad ḍefṛen abrid i yenǧeṛ umyaru ameqqṛan Belɛid at Ɛli yellan d amezwaru i d-yessufɣen tasekla tamaziɣt seg timawit ɣer tira”. Am wakken daɣen i d-wekkden yiɛeggalen n Tiregwa dakken deg unebdu i d-iteddun ad as-tuɣal i umyaru Belɛid at Ɛli yiwet n tejmilt meqqṛen ara d-yilin di temnaḍt n Leqbayel. Tajmilt-a daɣen ad tili d tagnit i tukci n warazen i wid irebḥen di temsizzelt. 

Rnu ɣef waya, Tasbeddit Tiregwa tṛeggem daɣen di tejmilt-a akken ad tefk tixṛiḍin n tɣuri “bourses d’études” i wumi tefka ismawen n tlata n yizumal n yidles amaziɣ: Besɛud Muḥend Aɛṛab, Masin Uhaṛun d Muḥend Ssaɛid Amlikci. Akken ad nesmekti, di tazwara n useggas asdawan 2013-214, Tiregwa tberreḥ-d i umeḥizwer ɣef texṛiḍin-a i twessem i yinelmaden n tmaziɣt n uswir unnig deg tesdawiyin n : Tubiret, Bgayet d Tizi Wezzu. 

Mokrane Chikhi  

- PUBLICITÉ -