Uqbel ad d-yers uɣamac n unbdu, imdanen ttagan kra n ttawilat akken ad sɛeddin tallit-agi n weẓɣal akken iwata. Izenqan yak ad ten-t-afeḍ ttwacerwen. Tizergatin ittwakkes-asen-t leḥcic akken kan tɛedda tefsewt, aceku angaru-agi, mi ara yeḥḍem ijebbed-ed iḥermemmuḍen, ladɣ izerman. Imdanen ttneqqin yak lḥala tama n leḥwaṛi-nsen akken ur tettnekkar ara tmes. S daxel n yexxamen daɣen yettili-d uqeɛed, uqbel anebdu. Tilawin, mi d tafsewt, ad rzun-t, d tirebbaɛ, ɣer wanda ara d-awint tumlilt ( d akal d acebḥan) s wayes ara d-begḍen-t sqef wad d-selɣen-t leḥyuḍ. Ma d win s wayes ara d-selɣen-t tiɣerɣert rnun-t-as zbel n tfunast ajdid, llan wid s irennun ula d imezuren n weɣyul, lak d cwiṭ n walim aṛeqqaq, acku win n lqaɛa, ɣef ayeg tqewwu lǧeṛṛa, ilaq ad yeṭṭef akken ur yettnekkar ara uɣebbaṛ. Tumlilt mi tt-id-ɣzant, ad tt-id-ṣawḍent s axxam. Uqbel ad tt-sxedment serkamen-t-ett, kra n wussan, deg waman, acku ur ilaq ara ad d-tt-eddu d tikebrurin lawan n ubeggeḍ. Mi terkem akken iwata, tumlilt-nni ad tili tefsi yak deg waman. Abeggeḍ maci d ayen isehlen. Leḥwal lak d iceṭiḍen ilaq yak ad d-tt-wasefɣen ɣer beṛṛa akken ur ttamsen ara. Deg waṭas n tikkal, mi ara ilin-t tzeɣwa meqrit, tilawin tteḥwiǧin-t afus n tallelt n tǧiratin. S uɣectu n tuzzalt, d aɣezfan, win ara ttebɣen-t ɣer lḥila anda terkem tumlilt, id d-yettili cɣel-agi. Akken kan ara d-sufɣen-t aɣectu deg wakal amellal irekmen ad zebḍen-t yas sqef yettwaxdamen s uɣanim. Mi kfan-t lak d sqef, ad zzin-t ɣef leḥyuḍ. Dagi sexdamen-t d ačelliq deg wemkan n uɣectu. Ilaq kan ad yettwabbeɣ akken iwata deg tumlilt, imir ad tesɛaddayen-t ɣef leḥyuḍ n tzeqqa, wid n tkanna, lemdawed, ikufan… Mi kfan leḥyuḍ lak d sqef, d nnuba n tɣerɣert. Aslaɣ n lqaɛa yettili-d s ufus. Mi yekfa ubeggeḍ d weslaɣ, axxam ad yuɣal d azedgan, d asemmaḍ.
T.Z.