Ddurt yezrin mi d-yerza lwali n waɣir n Bgayet imezdaɣ drus i yeḥsan taswiɛt-n ahat acku imi ass-nni ur yettak anzi aṭas i wass n tirza, ma neẓra dakken ddeqs n ugeffur ay d-yeɣlin ass-n, d ayen dɣa i yeǧǧan lwali ad yesseɛjel timuɣliwin-is deg tal tamnaḍt anda yeḥbes. Lwali tazwara yesres iḍarren-is deg Tdayra n Yiderginen (Dergina) anda ara d-yili yella-d umeslay ladɣa ɣef taluft n uxeddim i beṭṭu n teɣbalut n waman, rnu yerza ɣer yiwen n uɣerbaz anda llan ttmaggan ikayaden n BAC. send ad iḍil ɣef lǧamaɛ n umkan-n. Mi tekfa tirzi n lwali deg tdayra ilḥem-d ed wid dɣa yedakkalen yid-s, ama s yinemhalen n umeqyas-is neɣ s unmazul-is, ɣer tɣiwant n Tsexriwt (Taskriout), din yeḥbes ladɣa sdat n wadeg n tzeqqa n usileɣ (formation), syin akkin yella umeslay ɣef tesnawit n Maɛuc Idris. Taggara n tirzi, imḍebber amezwaru n Bgayet yuli-d i Udrar n Fad, ɣer tɣiwant n Ayt-Smaɛel imi d tisin i d-yusan deg teswiɛt teḥres, abaɛda ɣef taluft n tesnawit n Ayt-Smaɛel ed wawal merra i yuzzlen fell-as ma ad theggi tikkelt-a i Ctember neɣ uhu. Sadeq Rebbaɛi, anmazul n uselway n tɣiwant s leḥdaqa i ak-d-yefka isallen ɣef wamek teffeɣ s umata tirza-a n lwali i Ayt-Smaɛel. « Akken teẓram merra, ama s imezdaɣ n Ayt-Smaɛel neɣ s wid yettafaren isallen n tɣiwant-a, ayen i aɣ-iceɣben s waṭas d abellez n yiqeddicen n tesnawit. Lwali iɛeyyen tirmisin (entreprises) ara yesɛejlen lxedma akken i t-id-yenna s timmad-is, bac ad nessiweḍ ad neldi tasnawit xersum i yiseggasen amenzu ed wis-sin n ulemmud asnawan ». Mi d-isub lwali seg tesnawit yella-d umeslay ɣef temkarḍit n tɣiwant acku ula d tin sebken lecɣal-is seg tulacit n tedrimt ara yesnedhen ixeddamen. Taggara maḍi imḍebbren n tɣiwant n Ayt-Smaɛel utlayen i lwali ɣef taluft n unqal n unaray n yijadarmiyen ɣer sdat n tɣiwant.
Mhenni Xalifi