Ass-nni n larbɛa yezrin, 04 deg Yunyu, ddukklen-d yiɣallen n lxir akken ad asen-xedmen tameɣra i yimɣaren d warrac imeɛḍar n Ladayra n Yiberbacen. Imṭebber n Tzeqqa n tmeɣriwin n taddart n Umeɛraṭ, Mass Ben Ɛebbas, yeɛreṭ ad d-yenced imɣaren d yimeɛḍar n ladayra-a n Yiberbacen (ladɣa wid i yeqerran deg Uɣerbaz n yimeɛḍar n Tmezrit) s lmendad n Tdukkla-nsen. Ancad-a ɣer Tzeqqa n tmeɣriwin n Mass Ben Ɛebbas i d-yezgan deg taddart n Umeɛraṭ, yusa-d d tagnit anda i asen-d-iheyya yiwet tmeɣra meqqqren akken ad kksen ɣef ulawen-nsen, ad ttun cwiṭ seg yiɣeblan-nsen n yall ass, yerna ad sɛeddin tignatin yelhan am nutni am weyyiḍ. Ccɣel am wa d win iten-yeǧǧan ad ferḥen mačči d kra, lferḥ-a d win i d-beynen ama d nutni ama d imawlan-nsen yefuden tignatin yecban tigi ; ladɣa imi ttḥulfun dima s wallen iten-iɛezlen ɣef tmetti neɣ s wulawen yeqquren ur asen-nettak tagnit i tumert n tudert. Ayen yessefraḥen, d tikti-ayi n lxir, imi tazeqqa n tmeɣriwin kerrun medden s tuget i tmeɣriwin n zzwaj, tuɣal terra-d tiṭ-is ɣer yimdanen-a yuklalen aṭas n leɛnaya sɣer yal yiwen seg-nneɣ. D ayen ibanen ama d imeɛraṭen ama d imezdaɣ n Yiberbacen ur tt-tettun deg tudert-nsen. Tagnit-a d tamezwarut deg umezruy-is, s wazal-is deg lefɛel-is, nessaram mačči d taneggarut deg umecwar-is.
K. R