Accueil Tamazight Amek i d-usan wahilen n tiliẓri ?

Amek i d-usan wahilen n tiliẓri ?

2770
- PUBLICITÉ -

Deg teɣzi n wayyur n remḍan, yal ass deffir truẓit-is, wid yeṭṭafaren tiliẓri taɣelnawt ed wid iḥemmlen lemri – mačči i d-yettarran tugna – i d-yeskanayen aṭas n tugniwin, llan di ttiɛad akked tkemmict n wahilen, d timseḍsa, neɣ d tidwilin, neɣ d imazraren (séries). Deg-s tagnit i ushar i kra n medden, deg-s tin n tukksa ɣef wul i wiyaḍ. Ɣef wumuɣ (menu) nefren ihi tazwara ad nẓer d acu i d tamawt (rray) n yemsefliden, n uzayez deg wayen akk iwala. « Nekk ur zmireɣ ad ak-iniɣ gerrzen ulama s umata, walaɣ tuget deg-sen skud ulac anda ara sifsuseɣ lxaṭer seld laɛtab n rewwu n tgella. Ticeqqufin n temseḍsa « ssewsaɛ lbal-ik » i d-xedmen tikkelt-a nutni am tid n tmura nniḍen, gerrzent cwiṭ. Ma yella d isura, ama d « iḥeyyaren n tmeṭṭut » neɣ d « tigezza n yizri » neɣ d win i d-sɛeddayen send lmudden, nekk ur asen-ttakkeɣ ara tazmilt talemmast acku asinaryu d win ixussen maḍi maḍi, ad tḥulfuḍ am akken tlata-a n yisura i ak-d-bedreɣ ayen d yiwen ». Ay d-tenna yiwet n tlemẓit tasdawant. Nesteqsa wiyaḍ, yal wa tamuɣli-s, llan wid i d-yennan nekk yehwa-yi ala « Ḥricuc » akked « Mḥend amecḥaḥ », llan daɣen wid ɣer i d-iban dakken ur ttabaɛen ara akk tiliẓri taɣelnawt. 

- PUBLICITÉ -

Isinaryuten xussen, imyuraren ur gerrzen merra 

Deg yisura i d-yellan deg tiliẓri n tmaziɣt, tiliẓri taɣelnawt, d tin n tefransist iban-d am wakken lexsas amenzu d asinaryu anda i d-tettban teqqur tikti, rnu tettemcabah s waṭas akked wid nniḍen: amedya n usruḥ n ccfawa sɣur sin n yisegbaren (acteurs) deg yisura yemgerraden seld asehwu (accident), war ma nettu dakken ruḥen d tilubbayin (séquences) bezzaf d timeẓyanin. Sebba n tihwaht n tikti ama deg usaru n tmaziɣt « tinifift » neɣ deg win n tis-tlata, ahat imi ɛewwlen sɣezfen-ten i uḥric wis-sin netta ur iten-iwulem ara. Lemmer ahat ay d-snulfan asaru wayeḍ d amaynut s tikti tamaynut ahat ad d-yawi iman-is usinaryu. Tin ɣur-s, deg yisura merra tban-d tbujidant ɛinani, mi gezzmen tilubbayin tikwal deg ddaw n 25 n tasinin (isigunen) almi nḥulfa dakken wid yetturaren ur zmiren ad kken nnig n wakud-n nutni deg tigawt (action), ma ulac ad ḍsen neɣ ad asen-yeɛreq wawal ad t-sbelɛen. Dɣa d ayen ay d-irennun timreyyɛin i umsufeɣ (realisateur) s uɛawed tal tikkelt. 

Melmi ara iwali umseflid asaru s wazal-is? 

Ilaq ad t-id-nini, ula d tiliẓri nniḍen n yimaziɣen (brtv) ur d-tesken ara amgerrad n lɛali ɣef tiyaḍ, dima d yiwet n tikti, d yiwet n tugna, d yiwet n tuṭṭfa. Iban-d ula d adeg anda ara tettwarar tigawt ur yemmger deg leḥsab, isegbaren d yiwen-nsen. Ɣef waya asteqsi-a iḥettem-d iman-is skud yesmektay-d imal. Melmi ara nwali aqeddic deg uswir? Mačči am wid n Temrikt, iban. Maca ɛni d tidet ur nesɛa ara allaɣen? Isinaristen igerrzen? Yewwi-d kan ad tettwanefk tegnit war tamussni-nni ed txezzabit i wiyaḍ, ma yella d tidet d amahil iweqmen i yellan deg ddhen, ma yella d tidet d aɛeddi ɣer tsadrit (professionnalisme) i d iswi. Mačči d asɛeddi n ubehhir (tâche) akken i d-tusa kan, d tukkfa n i userref n yidrimen. Azayez yeggra-d yeffud ayen iwatan, ira ad iwali asenfel deg umaḍal n ssinima. Ticki iḍal ɣef wayen n lɛali ur d-yeqqar ara diri-t, imi ayen yelhan yelha. Maca send annect-a merra, yessulef ad d-terr tezmert tasertant awellih-is i tẓuri-a tis-sa, akken ad d-tesker isinaristen, isegbaren, imsufɣen seg temẓi, s usileɣ deg walbaɛeḍ n yiɣerbazen uzzigen deg waya. Ma d tura ayen nezmer ad d-nini dakken ssinima ama d win s tezwawt neɣ s teɛrabt, mazal-it deg uqaɛ. Neqqar-d ssinima « s tezwawt » acku ssinima « azwaw » ulac-it maḍi ar tura.                  

 Mhenni Xalifi

- PUBLICITÉ -