Accueil Tamazight I d-turwemt a Tulawin !

Ɛebdella Ḥaman

I d-turwemt a Tulawin !

1709

Ur  yessaweḍ ara 09 n yiseggasen asmi i t-iwin (netta d watmaten-is) xwal-is ar temdint n Wehren. Dɣa akka d-yufa iman-is wemsedrar amecṭuḥ n At Dawed di tlemmast n tmeti ur nettmeslay am netta, ur nesɛi leɛwayed n taddart-is. Seg lakul n Tamesgida n At Aqil, yaf-d iman-is di lmadersa Lfalah n Wehren. Akken yekcem lakul n temdint yemmuger-it-id uselmad-is s karuh. Mačči kan ur yeddifendi-yas ad yemelya taqbaylit : yekkat-it ula d tita. Mbla cek d lxir i d as-yexdem ṭalen-nni, im seg ass-nni i yerra Ɛebdella Ḥaman tamawt i teqbaylit-is, i nnekwa-s. Segmi yettimɣur Ɛebdella,  yettimɣur fad-is n tlelli. D fad-nni, dɣa, i t-yessaweḍen ad yaɣ « iberdan n tissan », iberdan-nni  yuɣ dadd-a Messoaud Oulamara di temneḍt-nni n Wehren. Icemmer Ɛebdella ɣef iɣallen-is, ad yebded  s lqedd deg udem n Fransa.  ṭfen-t iserkasen n Fransa deg wedrar Sidi Ali Benyoub. Hêkmen fell-as s 20 n  yiseggasen n lḥebs. Yesɛedda kra n wussan di lḥebs n Sidi bel Abbas, rrant-d ɣer lḥebs n Lambèse , « timeqbert n wid yedren », akken tt-yisemma Mohamed Haroud. Am Meursault n Albert Camus (L’étranger) yettafen dima ayen ar yexdem ula daxel n lǧedra. Dɣa yuɣal-as Lambèse  d annar n wesnulfu : yarra-tt i tira. Yerra lweleh-is i webrid d-yuɣ seg wasmi d-yeffeɣ taddart, i umezruy n tmurt-is, i wayen akk yaɛnan idles n yimaziɣen. « Werǧin d i-yeɛjeb wayen yuriɣ », i d aɣ-d-yenna Dda Abdellah, asmi akken tnemlal di rreḥba n wedlis amaziɣ d-yellan di Boumerdès. Yemmesla-ɣ-d, s wecmumeḥ, ɣef lweɛd-nni yefka i yiman-is di lambèse : « nniɣ-as asmi ara fɣeɣ si lḥebs, ad sekreɣ alama uɣaleɣ ssefruyeɣ am Omar Khayyam » Azekka-nni  n « les acoords d’Evian », yeffeɣ-d umeɣnas si lḥebs. D acu, imi l’OAS tesummel ddunit, i weɛer-as i ɛebdela Ḥaman ad yekcem s axxam. Dɣ di tmacint-nni t-yessawḍen ɣer Wehren, qrib t-nɣan  wid mazal ur qḍiɛen ara layas belli Lezzayer n Fransa. Ɣas akken, yewweḍ ar Wehren. Bac ad iruḥ ɣer « le quartier des nègres » anida yezdeɣ, ilaq ad iɛeddi ɣef « le quartier européen ». Mačči d ayen i isehlen, ɣas ulamma di ssifa-s yettak anzi i irumyen. Akken yewweḍ « le quartier européen », tebɛen-t iɛeggalen n l’OAS . Wweten-t s rṣas.  D Rebbi kan ur n rad ara, ttili imir-nni ara yemmet. Lḥasun iselek-as i « le quartier européen », yewweḍ ɣer « quartier des arabes ». Ula dina sḥesen-t « les indigènes » . Zzin-as, ɣilen-t d arumi. Bɣan ad d-rren seg-s tsar. Iheḍer-asen Ɛebdela s taɛrabt, yessefhem-asen belli d azzari am nutin, mimi ka i d-yeffeɣ si lḥebs. Ugin ad t-amnen. Nnna-s : « awah, keč d asbenyuli d taɛrabt kan i tesneḍ ». Ḥun a Rebbi yemmakta-d Ḥaman belli yessen limam . Tɛedda twaɣit Ur yettu ara Ɛebdellah  lɛhed-nni n Lambèse.  Yuɣ-d akeryun d ukarni yerra ɣer yiwet n tberna akken ad d-yesnulfu Omar El Khayyam. Akken yewwed, yessetḥa sidi Rebbi.  Yeffeɣ-d, yuɣal, yeffeɣ-d…  D lgirra gar-as d Ciṭan neɣ daɣen, Akken s-yeqqar J.PSartre « Gar Ciṭan d Sidi Rebbi (Le Diable et le Bon Dieu) ». Di taggara d Ciṭan (neɣ ahat d Rebbi, wi yezran !) ara ifazen… « Ilaq-iyi ad werḍeɣ ayen rẓagen d weyen ẓiden di ddunit. Tuɣ ɣur-i 26 n yiseggasen. Ul-iw yeffud tameṭṭut d ddunit ! ». Yeqqim ɣef ukursi deg tberna. Terra-d ɣur-s teqcict am aggur. Dda Ɛebdella yeqqur deg wemkan-is, i d aɣ-d-yenna. Bac ad yessuter « un coup de rouge », yessuter : « un lait fraise, svp ! ». Terra-yas-d tlemẓit: « le lait c’est pour les bébés ! », yerra-yas Omar Kkayyam n At Dawed : « cbaḥa-inem terfed-iyi d asawen, sanda ur yezmir ad iyi-ssiweḍ, le coup de rouge ! ». Imren i tezmer ad d-tlal tayri gar weqcic n At Dawed d teqcict n tberna.  Ahat d nuni d-yelha Brel deg taɣect-nni « Ils sont plus de deux mille/ et je ne vois qu’eux deux ». Lmektub yura ayen nniḍen. Yezwej Ɛebdela deg useggas n 1964.   Syin akkin, d amennuɣ nniḍen i wumi i begges. Ilaq ad d-yesker tawacult-is. Ilaq ad tezmer tḥanut-is (tuɣ-it d axeggaḍ)  i 20 n yiɛeggalen n twacult.  Ass-a, Ɛbdella Ḥaman, yettmeslay-d s tnefxa i mi yessaweḍ ad d-yesekker, ad irebbi 10 tullas d 06 warrac.  D wa i d lferḥ-i. Lferḥ-is wis sin d tamaziɣt. Ass-a, tadrimt-is d lweqt-is yefka-ten d « asfel »  i wayen akk icudden ar tmaziɣt. Dda Ɛebdella d abruy seg umezru n Lezzayer i yettnaḍahên tisselbi. Dda Ɛebdelah d argaz akken t-yettwali André Mrlaux (« l’homme est la somme de ses actes, de ce qu’il fait, de ce qu’il peut faire »). Dda Ɛebdella d abeqqa  i wid akk yestufan i wesmejger n widak yettarun… taqbaylit. 
Yeffeɣ-d yakan s tefransissit  deg useggas 2009

Salas.O.A