Lecɣal-is ttuɣalen i yiseggasen tura, tiqenṭert-a n Xerraṭa i d-yennernan bac ad tekkes taɛkemt i yinehharen, maca tamentilt (tasebbiwt) tagaɛmirt akken ad tessenqes seg twuɣa n yiberdan i d-iḍerrun teɣzi n useggas deg ufalu n Xerraṭa. Annect-a ad yili s usnebḍi n tkeryas tifessasin akked yikamyan i yeẓẓayen, ineggura-a i nutni ay tettwabna tqenṭert-a. Tuggdi deg ufalu rnan-as at ikumyan Aya ur d amaynut, afalu n Xerraṭa d rrehba weḥd-s, kra n yinehharen ssawalen-as « afalu n lmut », meḥsub yal mara yekcem yiwen deg-s ad tuɣal tmettant teqreb aṭas fell-as, ladɣa ma yesha ad yili daxel-is (daxel-is netta ed ufalu daɣen) yetturebba deg tnehra, rnu-as ifaq s lqidar. Ikamyan imeqqranen dimi ttilin-d deffir n yisehwa (accidents) i d-iḍerrun dinna. Ama s tɣara tusridt neɣ tarusridt. Yettusemma mara yili ukamyun yeẓẓay deg tikli-s daxel n ufalu, yesqelliq bu tkerrust tameẓyant, dɣa ad yeɛreḍ ad t-iɛeddi, din ad teḍru twaɣit. Rnu ɣer-s, takka ed zzhir i d-snulfuyen dinna, yettaǧǧa anehhar yefqaɛ, yenhewwal. War ma nettu aqqa nniḍen, belli yal mara d-yeḍru ubaxix d at tikeryas timecṭas i tent-yettawɣen ɣas ad yeḍlem bab n ukamyun. Ɣef waya ihi, ay kkren yinesdabuyen (autorités) ɣer tikti n usenfar-a n tqenṭert i ara yerzun kan at taẓayt. Ma d afalu n Xerraṭa ad yeqqim kan i tkeryas tibeztaḥ. « Tiqenṭert-nni yettban-id akken ilaq, nessaram ad tessenqes d tidet seg yiḥeyyaren n yinehharen. Mara ad tt-twaliɣ tettak-d udem dakken kfan lecɣal-is, wehmeɣ iwacu ur as-serrḥen ar tura ». Ay d-yenna yiwen n uɣerman.
M. X.