Terza-d ar tmurt n At Yanni yiwet n tiddukla n yimeɛdar si Berriyan, tamurt n imzabiyen, seg wass nni n 21 ar 29 ɣuct. Lembat n inebgawen-agi yella-d deg wexxam n yilmeẓyen. Tidukla-agi i yettbeddan i yimeɛdar n wallaɣ qqaren-as s teɛrabt «ssaɛada». Imḍebren-is d Mass Miḥerzi Muḥend d Ben aca Brahim. Tella tiddukla-agi seg useggas nni n 1996. Akka tura tessaweḍ ad terfed azal n 40 n yimeɛdar imeẓyanen. Maca, i wakken ad tizmir ad taweḍ ar meṛṛa iswiyen-is, ilaq-as ugens. Rzan-d s At Yanni, i wakken ad ksen lxiq, ad bedlen lhawa, ad issinen amek yettseḥir wedrar n Ǧeṛǧer. D tagnit i wakken ad d-issinen tudrin nniḍen am: Ifri Asemmaḍ deg At-Wasif, At Lqayed deg Iwaḍiyen, Tigzirt d kra d-ǧǧan irumanen, taftist n Uzeffun, atg. Tufɣa-agi n tiddukla tamẓabit d tis 6 seg useggas nni n 2009. Yenna-d Mass Miḥerzi, belli d tagi i tikelt tamenzut i d-rzan ar tmurt n Yiqbayliyen. Yenna-d daɣen belli yefreḥ aṭas s tirza-agi, imi iwala cbaḥa n tmurt n Leqbayel, d wamek ferḥen yisen yiqbayliyen di yal taddart i deg ara ɛeddin. Am wakken yessenmer aṭas massa Lasli Werdeyya, yiwet n tmejjayt n At Yanni i yellan ar tama nsen i tmudi n wayyen kkan deg At Yanni.
Daḥlal Canez