Ddurt-agi iεeddan, teḍra-d yiwet n tikli sγur wid i ‘’iḥemmlen’’ tarbaεt n Yilmeẓyen n Leqbayel (JSK) deg temdint n Tizi Uzzu. Ssawlen-d γur-s i wakken ad d-beggnen lγiḍ-nsen i yimḍebbren iγelnawen n ddabex uḍar ; i wakken ad asen-inin, di&gamma,; ur qbilen ara rray i d-ssufγen mgal tarbaεt-agi. Am wakken sutren deg lwali i wakken ad asen-yini i yimḍebbren-agi ad uγalen deg wawal-nsen. I usmekti, Ebossé yettwanγa ass 23 γuct 2014 deg unnar n Tizi Uzzu di taggara n temlilit n ddabex uḍar gar JSK/USMA. ‘’Xas ulamma timenγiwt n umyurar Ebossé mačči d ayen meẓẓiyen, meεna ur ilaq ara ad yeglu uzegzaw s uquran.’’ I aγ-d-yenna Djamel. Aṭas n yimdanen i yesteqqsayen amek ssawḍen yimḍebbren-agi ad agin i yimferğen n JSK ad kecmen akk γer yinurar n Lezzyer mi ara telεeb terbaεt-nsen ? Γef wanect-a i aγ-d-yemmeslay yiwen n yilemẓi :’’ad γelqen annar n umenzu n unbir n Tizi Uzzu, ad t-nefhem ; ad xeṭṭin tarbaεt n JSK, ad t-nefhem daγen, acu kan ad agin i wid iḥemmlen tarbaεt-a ad kecmen γer temliliyin ara turar deg yinurar n Lezzayer merra, dayen ur iqebbel leεqel. Aya, qqaren-as taneḥyaft. Leεmer teḍra di ddunit kamel.’’ Wiyaḍ ttmuqulen amek ara izmiren iγallen n laman akken ad fernen gar yimferğen n JSK d wiyaḍ di tewwura n yinurar ? Akka, dγa, i aγ-d-yenna O. Akli s teḍṣa :’’ahat, ad asen-ḍelben nkawi-nsen, neγ ad walin swayes ttmeslayen.’’ Ayen ara iḍerrun deg yinurar yesbanay-d udem n tmetti. Tamsalt teεna akk Izzayriyen mačči ala Iqbayliyen neγ wid iḥemmlen tarbaεt n JSK. Tamsalt teεna tawacult, ddin, aγerbaz akked yimekwan n uxeddim. Ma yella yal yiwen yeqqar a ḥeqq nekk, yettagi wiyaḍ, amek ara tṣeggem ; ma yella cwal yeṭṭef amekkan n talwit, lkerh yeṭṭef win n tayri, ungif yeṭṭef amekkan n umussnaw ; ma yella Azzayri ar ass-a n wussan mazal yettnadi i t-ilan, ma n umalu neγ n usamar, amek ara tṣeggem.
Ihi, imi tewweḍ twacult mebla aḥkim ay neḥṣa ad yili ‘’Uḥkim ur nesεi ara aḥkim, anwa ara yugad ma yeqqim’’ i as-yenna L. Ait Meinguellet.
Hocine .M