Isteqsiyen ttnernin, akken ttnernin waṭṭanen s timmad-nsen, ma d tiririyin ɛeddi kečč afi-itent. Amdan deg zzman-a yeggra-d yettaḍen aṭas, yal ssenf n lehlak yennulfa-d deg-s, almi tuɣal ala tuggdi i izedɣen allaɣen. Akken i d-teqqar tussna n tujjya, ma yella ayen itett umdan taggara-a yettekka s waṭas deg uẓuɣɣer n waṭṭanen, mačči ala ayen-nni ay d sebba. D tidet, skud kullec yuɣal yettwaxemmal, yettmagga deg tneɣrafin (luzinat) akken ad yaf tinkulin (tibewwaḍin) syin akkin ad t-id-yaɣ umdan i uɛebbuḍ-is, iban ulac deg-s aṭas n laman, seg tama n tamḍerra i d-ttakken akk i tfekka. At zik, yuɣ lḥal ur ssinen akk acu d uzzal ala deg kra n twuri. Kkan-d seg wakal, teṭṭsen ɣef wakal, tetten deg ed s wayen i d-imuggen s wakal (am teccuyt, aḍebsi ed tɣenjawt), rennun daɣen ttkalayen ɣef ukeccuḍ neɣ asɣar i ussifses n tudert s wallalen nniḍen, am sseqf, tawwurt, ṭṭaq, ṭṭabla, ed tɣawsiwin nniḍen n tyerza. Ihi seg tama-a, yexser umdan n tudert tatrart deg d-nessqer, anida tal taɣawsa i d-ixeddmen kra d uzzal (am tmacinin, luzinat, atg). Ma yella uzzal isellek-aneɣ seg teqburit, iḍurr-aneɣ deg tdawsa. Lamaɛna akken yebɣu yili, ur tesbik ara kan deg tgella. Tella taluft d tagejdant, yettu-tt umdan bac ad yili deg tezmert igerrzen: wayi d addal. Acimi nuḥen yiɛebbuḍen tura ula ɣur at ɛecrin n yiseggasen? Acimi yettuqqet waṭṭan n tujit neɣ n tufayt ula ɣur warrac? Iwacu zhuren, ferrɛen, ftin waṭṭanen yesserhaben ɣur umdan? Aya, acku ur yettazzal, ur yettag addal. Xersum s kra n tfesna. Zik ur ssinen awal « addal » maca xeddmen addal war ma ẓran, acku llan ur ssinen daɣen awal « takerrust ». Addal-nsen ih yella d tikli, tikwal leḥḥun alama d 80 n yikilumitren i wass, ama i tkessawt, neɣ i tnezzut, neɣ i uḥewwes, neɣ ɣef tfellaḥt. Lḥasul takerrust-nsen d aḍar. Nekni ass-a ula d tikli-nni, allal (ttawil) amenzu n umdan ulac-itt. Win ara d-yeffɣen seg uxxam, s wazal n 15 n yisurrifen, ad ak-yaɣ takerrust alama d amḍiq n umahil, din dɣa ad as-iqessaɛ deg ukursi seg tmenya alama d rrebɛa. Ula d tarwa-nneɣ, n temdint neɣ n udrar, nuɣal nebɣa ad asen-nekkes idles n tikli. Tasebḥit ad ten-nessiweḍ alama d imi n wawwur (portail) n uɣerbaz, tameddit daɣen, ad nelfu ɣur-sen ad ten-id-nerr s axxam dima deg tkerrust war ma lḥan ulama d 10 n temrac (deqqayeq). Anda-t waddal-nni? Ansi ihi ara d-tas tdawsa? Acu ara yerren aṭṭanen? Ulac. Deg 22 seg ctembre iɛeddan, d ass agreɣlan war takerrust, neɣ i tikli ɣef uḍar. Tuddsa Tamaḍlant n Tdawsa (OMS), tessuter deg yimdanen ad sneqsen ulama tikkelt i useqdec n tkerrust akken ad ǧǧen iḍarren-nsen ad ḥerrken. Skud yella wass amaḍlan i lmendad n waya, ihi iban belli taluft tezger akkin i ujerriḍ azeggaɣ. Akken i d-qqaren yimejjayen, amdan, yessefk ad yelḥu ma drus tlatin n temrac i wass. Amdan yennerna-d i ugama, agama yemmug i ucali. Ihi, ilaq ad nɛiwed tamuɣli deg wannect-a. Ladɣa aḥric n warrac imecṭaḥ. Ur ilaq ad ten-neǧǧ ad ttwaṭṭfen s tqerract n tkerrust akked tin wurar n tvidyut nutni tḍurrun iman-nsen. Rnu deg uɣerbaz ḥaca xeddmen addal yiwet n tikkelt i ddurt ma telha tegnawt kan.
Mhenni Xalifi