Azekka ara tebdu temlilit tagraɣlant tis tlata ɣef tsekla tamaziɣt i d-tessudes tesdawit Akli Muḥend Ulḥaǧ n Tubiret. Timlilit-a ara yekken sin n wussan, ( ass n 04 d wass n 05 n unbir 2014), ad d-tawi ɣef usentel: « Tamukrist n tewsatin tiseklanin n tmaziɣt seg tamma n : Tbadut, asemmi d usismel ». Ilmend n tifrat n tmukrist-a icudden ɣer leṣnaf neɣ tawsatin n tsekla tamaziɣt, wid i d-yessudsen timlilit-a necden-d aṭas n yimusnawen ara d-yasen ula seg tmura tibeṛṛaniyin ladɣa Lmeṛṛuk akked Fransa. Ɣef wakken i yaɣ-d-yenna pṛufisur Mohamed Djellaoui amasay n temlilit-a daɣen d aselway n tmezdayt n tsekliwin d tutlayin di tesdawit n Tubiret : « Sennig n yinagmayen ( imusnawen ) ara aɣ-d-yasen ɣer temlilit-a seg tesdawiyin yemxalafen n tmurt n Lezzayer ladɣa seg yigezduyen n tutlayt d yidles amaziɣ ; ad aɣ-d-asen tesɛa n yinagmayen seg tmurt n Lmeṛṛuk , rnu ɣur-sen daɣen wid ara d-yasen seg tmurt n Fransa . Aya akk neḍmeɛ deg-s ad yili d tagnit ilmend n useqreb n tmuɣli n yinagmayen-a ara d-yeglun s usezdi n tikti ɣef temsalt n usemmi d usesmel n tewsatin n tsekla tamaziɣt ». I usmekti, tamsalt n usemmi d usesmel n tewsatin n tsekla tamaziɣt, yella deg-s umgired ama ger yiselmaden n yigezduyen n tmaziɣt neɣ inagmayen i iqeddcen di taɣult n tmaziɣt, aya d ayen i d-igellun s yiɛewwiqen ladɣa deg uselmed n tewsatin-a i yinelmaden. Yuɣ lḥal uqbel timlilit-a, tasdawit n Tubiret tessudes-d deg yiseggasen iɛeddan snat n temliliyin tigreɣlanin yerzan taɣult n tmaziɣt. Snat-a n temliliyin iɣef d-yella ilmendad pṛufisur Muhamed Djellaoui, tamezwarut tewwi-d ɣef umawal n tmaziɣt d useqdec-ic deg uselmed ma d tis snat tewwi-d ɣef tmukrist n uselmed n tmaziɣt di tesdawit. Mass Mohamed Djellaoui, di temlilit i nga yid-s di tesdawit n Tubiret, iger-d tiɣri i wid terza temsalt-a n tewsatin n tsekla, d temsalt n tmaziɣt s umata, akken ad d-asen ɣer ludiṭuryum n tesdawit n Tubiret ad ḥeḍren i yisaragen, am wakken daɣen i zemren ad zeddin deg uskasi. « I kunwi n kunemti s wid neɣ tid i teɛna temsalt n tmaziɣt, lɛeslama s yal yiwen, s yal yiwet, aqli-ken (kent) tettwanecdem(t) s lǧemla akken ad tḥedṛem(t) i yisaragen d uskasi ara d-yilin di ludiṭuryum n tesdawit n Tubiret ». Ta d tiɣri n mass Mohamed Djellaoui, amassay n temlilit-a ara yebdun azekka ṣbeḥ.
Mokrane Chikhi