Tewḍed tagrest , tewwid yid-s ssem-is. Isɣaren yembarzaɛen di lexlawi bezgen. Ma d wid yedurin lḥid , ḥadmen. Aten-nni di tesga ḍelqen. Liqa-nsen yeqquren tebda-t targagit. Ẓran acu iten-yegunin : leqrar-nsen d lkanun. Taggara-nsen d iɣiɣden. Tikwal ay aḥbib, ttif lexlawi m yegris wala tizeɣwa m times. Allaɣ isebken , yebɣa ad yaf abrid ɣer tafat. Dderz n tsusmi yetthuddu iɣulad n lefhama. Ayen yettwaskelsen ɣef tasfift n waktayen yewwid zhri-is ɣef lemwaji n ccuq. Timucuha-ak a wul dirit-ent! Ddnub-is d-asmi akken ifaq belli afurk ɣef i nejguggel yerka. Widen yettmeyizen gzin anamek n wawal: “ ma tesuliḍ… d ilem i terniḍ. Ma tesgrarbeḍ..d-ilem i tesnerniḍ”. Iniɣman ifesren di ṭerḥa, lxuf-nsen werǧin yelli d taweka. Netta la d yettmeslay. Ɣef yinyen teɣalayt tesbuxur iragen-is. Wissen medden ma ẓran acu akken id ttewwen? Leqwa yeɣunza ufenjal, tesṛuḥ lbena-as deg yimmi n lqum yeččan deg uɣunja. Nesla-as asmi id yenna : “a bab n leqdra, dawi neɣ awi s lemɣewla”. Oh ay aḥbib, ur iduwa ur yewwi. Ayen iɣ-yewwin d-ahdum. Ayen iɣ-yerwin d zyada n unezgum. Tisirt mi aren ten-taɣ deg leryac, ula id-as d- is xedmen yiɣuraf. A bu yiwet bru i snat amer tis tlata ad –ak texḍef! Yeɣli lmizan i wawal. Annef ihi ad rɣan yisɣaren. Akka id d-udem n tagrest. Tesiɣzif di lxiq n umawan. Win iɛabden cyaḍ…yemuger iṭij s tesmeḍ. Ugin ad neflan yissafen. Ctaqen deg urɣu ad rran ttar. Aman yettazalen lemden aḥnunef n wazrem. Wama d-kečč neɣ d-nekk nessen lhejna n wawal: “ asmi akken yettṛaḥ lbarud, timerkaḥin ttlent deg meɣrud. Tura mi yettraḥ ulaɣmud,bgensent timerkaḥin ɣer leqyud”. Iban tura amek akken i t-cudd. Siwa tislit is-yesnan i usennni n yizuraz. Lqid-ik a gma d-iman-ik, lḥebs-ik d yir tikli-k. Akka i d udem n ctawi. Wa ihamel adari wa yettraǧǧu deg leḥmali. Tecfa-m asmi i t-id-yenna: “ argaz yedreɣlen yesla/ I ugugam yenna/ aten ssem di tarbut”. Ulac tislit deffir uẓeṭṭa. ulac amɣar nnig tasga. Ulac arrac ara d yezzin i tamɣart ad annin timucuha. Tura lemqud ɣer tiqfilin. Tagamin ɣer timudiyin. Yelha ẓwic deg lyali. Rɛacen yizilan ɣef ayen ite-yeǧǧan. Amerḍil tikelt-a wissen ma ad yerḍel? Xas yebɣa ad yerḍel ur d yegri acu ara yerḍel.Nesla kan mi id as yenna: “ ma nedda nendem, ma neqqim newhem”. Ay aḥbib dari lḥiḍ , xas nnig-as ulac Ṛebbi. Akka i d-cetwa. Yal taqenuzt s nnuba-s.Ɣef ufagag n lḥir-ik tdelqeḍ ulman n lɛedz-ik. Sebba tella : Sebken yidamen. Qujren yiḍaren. Ddubzen wallaɣen. Gersen wulawen. Xas akken, ahat,tecweḍ tasa! Lhiba tamaɛlalt tecba tasa uyaẓiḍ. yak nniɣ-ak: “ anida teqras…deg amdiɣ deg ik-teɛkkes”. Ma yekrez unyir s lmeɛun n tizelgi-k , lɛib deg tiregwa-s i yedewir. Nnan-ak si zzman: “a bu watmaqen, win ik-yukren arkas d atmaten”. Ayen tumza ɣef yixef , ma yella win is yunnin tiklin deg uqaru d icc n yilef? Ay aḥbib ɛaḍf-as neɣ xelfa-s, ṭelqa ik yurzen yiwet! Akka i d-tagrest. Tssettu leqher n tmes. Tecfiḍ asmi rɣant tizegwa. Isekla negren , kečč thuzeḍ tuyat. Deg ufezqi n “wacɛendi fih” i tkemneḍ lebɣi-k. Tegzem-ḍ –as ula d nnefs. Teqdeɛḍ-as aḥarek. Yecbek! Tedra-tt yid-s am uferṭeṭu yedewiren ɣef lambat. Ur yeseḥama, ur iwala. Yeknef kan yerɣa ur d yeseweḍ ṛṛuḥ a teɛeddi cetwa. Ahat lemnaɛ yella di tmettent … anda neẓra nekni? Widen yesnan , xas akken snan, ayen akken snan ur d yegli s tusna. Tusda mačči d –asmed neɣ d adukku. Asmed, tikwal, dzyada n taẓayat ɣef yixef. Akka id as-nnena asmi akken akk d tugdi nemyufa. Aciwen xas ma bernen, werǧin suksen-d lefrisa deg yimmi n yizem. Ḥnunfent tigecrar. Iles yemceḥ aɣebar. Maɛna yelha uɣabar , yessen ad yesmundel allen. I wumi allen i lqum yuɣunzan awali? Ayen yefran deg ikufan, d yir cḥani a win id –ak-yeḥkan. Siwel tamacahut…neɣ mulac taqṣit-ik ɣer twamust n tmucuha bru-tt! Seɛbent ctawi ɣef win yettun tebrek n tafsut. Seɛbent ctawi ɣef win ur neddir izilan unebdu deg ḥarqen n Busɛadda. Seɛbent ctawi ɣef win ur nerssin d acu I d-ndma. Deg umawan id yettmektay lmal ayen yexdem deg-s leḥṣum. Walli a gma tuga, xas teqqur ad tenunet. Walli a gma tizegwa , xas rɣant ad leqḥent. Walli a gma tiregwa, xas fudent ad jemɛent. Walli a gma lɛinṣer, xas yeqqur ad ifegeḍ. Iggeni ur yelli d aɣedar, yewwi-d asigna s lqis. Akal ur yelli d anekar, yefka-d amud-is s lqis. Ulayɣer ad nesetɣfer , nekni ur d neǧǧiw ur ken-nettxeliṣ. Akka i dudem nesɛa. Akka i nemuger cetwa. D asḥurejdel i d- tikli-nneɣ. D asfrefed i d-anadi-nneɣ. D asseɛillew i d-tamuɣli-nneɣ. Nɛamed leɛyub ɣef yixef. Nɛamed yir awal ɣef yiles. Newwi yir tesmin d aggus. Agusim am lḥirqus nettnadi isufar-nsen deg idmim. Nezwi akarmus s umelway, nelqeḍ azemur s uqarac. Anda-tt, imi akka, lwehma ma nelleɣwi, anda-t lɛar ma nemyezwi?
Ait Slimane Hamid