Accueil Tamazight Mazal yettsemmid «umennuɣ» gar Djezzy, Mobilis ed Ooredoo

Mazal yettsemmid «umennuɣ» gar Djezzy, Mobilis ed Ooredoo

1906
- PUBLICITÉ -

Segmi i yennerna useqdec n tilifun n ufus deg Lezzayer deg tazwara n tmida tis 21 ladɣa, i d-isersen tatiknulujit-a i walmend, ttemɛanaden kraḍ n yimahalen (opérateurs) n tilifun aziraz (mobile) s tɛessast n wa ɣef wa am umcic ɣef uɣerda. Anwa i d-igan askan (offre) amaynut, anwa i d-igan asmal (promotion) igerrzen, d acu d iqeddicen i d-yettak yal yiwen, acḥal i d-iḥesseb ssuma-nsen…atg. Lḥasul, tal takebbanit d tamzenzut, tebɣa ad tesserḍu imsaɣen-is, ad ternu ad tejbed wiyaḍ. Ahat tasertit-a yebda-tt umahal n Ǧizi ɣas ma ar tura d netta i d wis-sin i yesɛan ugar n yimsaɣen (clients) deg tmurt n Lezzayer deffir n Mubilis s 11,66 n yimelyan d amsaɣ. Ahat imi yessaweḍ aẓeṭṭa-s (réseau) ɣer waṭas n twilayin n tmurt send imahalen nniḍen. Rnu-as akk ayen i d-yefka d iskanen i yeffɣen xilla ɣef yimsaɣen-is ladɣa send ad yekcem 2010. Imi, ɣef tnaga n waṭas, aḥerrek n Ǧizi ed ujbad n uwellih n ukelyan-is yenqes seg 2010 ɣer da, ma neẓra dakken aṭas i yella yessuter-d i yikelyan-is deg tallit-nni, tura yekkes-it. Ɣas ma yuɣal-d ussan-a s yiwet n tecriḥt (puce) mu isemma Go. Amahal n Neǧma seg tama-s, segmi yuɣal d Uridu yessexreb cwiṭ leḥsabat n yimsaɣen-is, mi ugaden ladɣa ad tettwibdel tsertit n uselḥu gar Neǧma n zik ed Uridu n tura. Amahal-a dɣa, yessaweḍ taggara-ya ad yerbeḥ aṭas n yemsaɣen deg umuɣ-is akken i d-iwekked netta s timmad-is. Ma nesteqsa ɣef tmentilt (sebba), ad naf yezmer ad yili d ismalen n ubunis (promos bonus) i d-yettak deg tkarḍiwin n uɛemmer (carte de recharge) seg wacḥal-aya tura. Rnu-as daɣen mi yessewsaɛ isummar-is deg ulzuz (marché) almi yeǧǧa amsaɣ deg tegnit tgerrez skud yezmer ad yefren ayen i t-iwulmen: am Uridu 2000, la star, ḥala, la one…atg. Yuɣ lḥal, taggara kan, yessegraw-d Uridu aṭas n yedrimen s uskan n Galaksi+tacriḥt deg-s 4000 n yidinaren. Aṭas dɣa n yilemẓiyen ay ineggzen ɣef tegnit-a sfayden-d seg-s. Maca Uridu, ɣas ma yuẓa taggara-ya ɣer sdat, aql-it s 10,05 n yimelyan n yimsaɣen kan. Amahal n Mubilis, s wazal n 17,84 n yimelyan d akelyan almi d 2014, ad yeqqim deg tqacuct seg tama n umḍan n yimsaɣen. Aya, acku yesɛa daɣen ddeqs n yimsaɣen imekdiyen (clients fidèles), ladɣa s tecriḥt-nni tuzzigt n yisdawanen (universitaires), neɣ d askan n tiɣri n baṭel seg yizireg (la ligne) ɣer tayeḍ. War ma nettu dakken, deg waṭas n tamiwin, Mubilis d asellak n yimezdaɣ i yettwaɛezlen imi ala netta i asen-yesbaddaden aẓeṭṭa deg waṭas n tegnatin s yiswi n unekcum ɣer tatrara. 

- PUBLICITÉ -

Alḥaq n 3G++ yesseqlaɛ amɛaned

Ɣas ma inuḥ seg wacḥal d aseggas tura akken i t-id-nenna, maca amḥizwer ɣer wulawen n yiɣermanen (citoyens), izad segmi i d-telfa tetiknulujit n rrizu aɛlayan n tilifun 3G++, anida yal amahal yettqazam akud bac ad yessiweḍ d amezwaru aẓeṭṭa-ya atrar ɣer waɣiren n tmurt. Yuɣ lḥal, d ayen ay d-ssuturen yizzayriyen merra skud ɛyan seg tuqqna n internet i ur yezmir ad iqil wallaɣ. Deg waya, ma yella Uridu akked Mubilis ssawḍen ḥuzan ḥawla n twilayin deg ddeqs n wakud s 25 n twilayin i d-yeṭṭef umezwaru, akked 19 wis-sin, Ǧizi mazal iḍul cwiṭ skud yella d aneggaru i d-yesneɣmsen s uqlaɛ n tetiknulujit-a ɣur-s, dɣa yesduri ar tura 14 n waɣiren kan. Akken bɣun muggen yiqeddicen, amsaɣ ad yeqqim d agellid, ad yefren ayen mu yesra ed wayen ara as-yessifsusen tudert.                

Mhenni Xalifi

- PUBLICITÉ -