Sliɣ-as i usefru di tikli-s aḍu yewwi-yi unageɣ akin i lmut, ttxemmimeɣ asmi ara mmte :
Ttxemmimeɣ asmi ara mmteɣ
Rruḥ-iw anda ara iruḥ
Ma am ṭṭir ara ssrifgeɣ
Neɣ ad kkfun fell-i leǧruḥ
Wissen dinna ma d-imɣureɣ
Neɣ ad qqleɣ d amecṭuḥ
Neɣ ass-nni ara d-laleɣ
Ad d-afeɣ iman-iw di dduḥ
Tamedyazt-is tnuda-d ddunit, igarawen, tuffeg s igenwan, tɣezz deg wakal, teskfel-d iɣsan yeddel, tɛedda akin i lmut, di tallit deg-i anda swayaε ur sεint ara iṛeqasen. S ssut n tmedyazt-is yesbur s uẓawan atrar yennul tameẓẓuɣt n waṭas n yimdaden.
Di Micli ilul-d Ɛmiruc AMWANES amedyaz, tamedyazt tlul-d yid-s, tettazzal deg yidammen-is, talqayt n tektiwin-is yessefruri-tent-id deg yimeslayen, yebna-tent d tibḥirin n yisefra izerben s iɣuyad n tmedyazt :
Qqimeɣ weḥd-i ttxemmimeɣ
Deg yiḍ i ṭṭlam di tejmaɛt
Ccaxeɣ, ssbeɛdeɣ ruḥeɣ
Sin n leqrun akka ɣer sdat
Am wakken di tziri zedɣeɣ
Kul tiɣilt tesɛa taddart
Ttmeyyizeɣ ttwehhimeɣ
Kecmeɣ di ddunit tis snat
Di temẓi-s yemmal ɣer tezlit, ɣer cna, imi yessaweḍ yessekles tasfift n tezlatin maca ur tt-id yessufeɣ ara ɣer ssuq, yeǧǧa-tt kan ɣer ɣur-s acku iḥulfa akken s tezlit ur yezmir ara ad d-yessenfali ayen izedɣen ul-is. Yeddem yewwi abrid n tmedyazt s tmenna yerna icebbḥ-itt s ssut-is akked uẓawan, ayen iwumi neqqar s tutlayt n tefrasist «Le slam», «le slam» s teqbaylit, d aɣanib amayut deg waḥric n tẓuri di teqbaylit.
«Iḍudan» d izwel n uḍebsi-ines amezwaru d-yessufeɣ deg useggas n 2011. Deg useggas-agi, 2014, yerna yessufeɣ-d aḍebsi amaynut anda i as-yeqqar «Akin i lmut», deg-s yexdem yiwet n tezlit netta d ucennay Zedek Lmulud, yerna tayeḍ akked tarbaɛt n Abranis.
Xas ma nekk-i-nni d amdan
Kifkifeɣ nekk d usennan
Tesseɣ akken i tess deg waman
Yettnerni ur yettḥarrik din
Xas nekk tt-beddileɣ amkan
Ula d nekk d amdan
Tt-ɛicin deg-i wussan
Mi nnerneɣ ad nnernin
Wissen anwa lawan deg-i ilul zman
Neɣ di zman i ilul lawan
Neɣ yeɣleḍ win i asen-isemman
Ur ẓriɣ d acu-tt akin
Amiruc d yiwen n umedyaz ixedmen imeslayen i tugget n yicennayen gar-asen ad nebder, tarbaɛt n Abranis, Belɛid Abranis, Akli. D, Aɛmer Uqasi… d waṭas nniḍen.
«Tibḥirin n tafat» d izwel n wammud n yisefra i yettheggi akka tura, deg-s ad d-yesdakel akk isefra n sin n yiḍebsiyen-ines i d-yessufeɣ yakan iseggasen yezrin. Deg-s ad d-yernu kra n sin ar semmus n yisefra imaynuten ur yellin ara di sin n yiḍebsiyen-ines yezrin, deg-s yal asebter n usefru ad t-id iqabel wunuɣ yeddan d usefru-nni.Isenfaren n Amiruc qqwan aṭas, akka tura yettheggi aḍebsi amaynut, aḍebsi wis kraḍ iwumi iruḥ ddac-ddac.
Tansa n Talsa