Accueil Tamazight Taxbizt

Taxbizt

1697
- PUBLICITÉ -

Mḥend d yiwen uzzayri ikerhen iman-is. Netta akked lmeḥna  d tizyiwin, akken id lulen, ur yessin ad iɣer neɣ ad yaru. Asmi yekcem ɣer uɣerbaz yezga weswir-ines ulac, yettɛawad kan i iseggasen, ɛyan deg-s ula d iselmaden-ines dɣa ḍeggrent ɣer uzniq yerwa nemḍar deg yiberdan. Asmi yeɛya deg umeṭar  deg yiberdan n taddart iqelleb ùef uxeddim. Maca ala lexdayem yenɛettaben i t-id isaḥḥen. Yendem alarmi dayen kan imi ur as-yefki ara azal i leqraya. Maca ndama tettas-d taneggarut. Mḥend yettidir tudert n uydi. Ixeddem aṭas, yettaɣ ciṭuḥ n yidrimen. Yesɛa 40 n yiseggasen, ad t-waliḍ ad as-tiniḍ 80 n yiseggasen i yesɛa. anyir-is yeččur d tiregwa ad as-tiniḍ d amekraz itent-ikerzen. Allen-is nexrent ɣer sdaxel, lqedd-is yekna, arqiq m umesmar, iɣsan-is ttbanen-d ɣef uglim-ines. Asmi yewweḍ tizi n zwaǧ, yettqellib tinna d wara yezdi lmeḥna-s. anda yewweḍ, ɣer tinna yewweḍ ad d-tefk 3 yesteqsiyen

- PUBLICITÉ -

 -Ma teɣriḍ ?

-Ala

-Ma txeddmeḍ ?  

-Ih

-Ma tettaɣeḍ aṭas ?

-Ala

-Ur teɣiriḍ, ur tettaɣeḍ aṭas, yerna t-ḍemɛeḍ ad taɣeḍ yelli. Tenwiḍ ad tidireḍ tayri d waman isemmaḍen, ruḥ ad tt-leɛbeḍ ɣef yiman-ik.

Alarmi yerwa tid-ak yuran i yufa tameṭṭut icuban ɣur-s. ur teɣri, ur tezyin, ad as-tiniḍ teffeɣ-d srid si ǧahennama. Yesɛa-d ṭeẓẓina n yigerdan yid-s. 

Mi ifukk lxedma-s, yekreh ad yekcem s axxam acku yal 

yiwen yettsuɣu :

-Aɣ-iyi-d aqrab !

-Awi-yi-d ayefki !

-Awi-yi-d zzit !

-Xelles aman akked trisiti !

Mḥend yezga yettazal deffir texbizt, anda tella ad tt-yeḍfer, nettat treggel fell-as. Yerwa lemrar fell-as, tectaq-as iḍes.  Yal ass yettnekkar send ad yecreq yiṭij, fell-as yedda ḥafi, yeqbel ddel. Yezga yettsuɣ fell-as umɛellem-ines, netta yessussum kan akken ad tt-dum fell-as texbizt-is, acku axeddim ixus, fell-as ur yeǧǧi amkan, yexdm di seḥra i iṭij yesserɣayen, yexdem deg udrar i ugris igezzmen imeẓẓuɣen. Fell-as yexdem acḥal n tɣawsiwin. Yexdem d imaswaten, yessareǧ isebbaḍen, iferreɣ acḥal n tzebbalin, yenɣec acḥal d isekla, iɛebba ayen ẓẓayen, asɣar, lyajur, ssiman… 

Tagara teǧǧat tezmert, laɛqel-is yexser, yuɣal i teddu dg ubrid yeshetrif, yettcuddu taxbizt s lxiḍ ɣer wammas-is, yezzuɣur-itt, yekkat-itt yeqqar-as :

-Acḥal-aya ṭafareɣ-kem kemm treggleḍ fell-i, tura tezzi-d nnuba-m d kemm-i ara iyi-d-iḍefren.                            

  H.B

- PUBLICITÉ -