Anwa ur nessin ara Dda Maḥmud BUƐRABA di temnaḍt n Buzgan?
Imi ara i teddu deg ubrid-is s nwaḍar-is akked učapun yezga ɣef uqerruy-is. Ad as-tiniḍ d asegbar n ssinima, yrsdukel lqedd d ssifa.
Ilul-d deg taddart n Takuct, d amjahed, d win yettikin di tegrawla 1954 n tmurt n Lzzayer mgal Afransis. Asmi tewwi tmurt-nneɣ timunnent-ines, Dda Maḥmud, yufa-d axeddim di tɣiwant n Buzgan, xas ma tazayezt-ines meẓẓiyet, yessaweḍ yesseker-d arraw-is, irebban akken iwata. Lbaṭel n ucengu Afransis yeǧǧa-d cwami di tudert-is, d cwami ijerḥan ul-is, mazal zedɣent cfayat-ines, d aya it-yerran yessenfali-d akk ayen izedɣen ul-is s tẓuri-ines, ass-a yuɣal d aserqat, ineǧǧer tiɣawsiwin s usɣar.
Asmi yeffeɣ tastaɣt , akud-is akk yefka-t i tẓuri n wayen iḥemmel, ijemmaɛ tiqqaraɛtin n plastic, ineǧǧer deg usɣar ixeddem-d s yess ibeckiḍen , timucarin akked imrigen akk yessexdem ucengu Afransis mgal aɣref Azzayri, akken ad yessenger agdud-is.
Dda Maḥmud d yiwen yesseḥbibiren ɣef twennaḍt war ma yeẓra, imi tiqqraɛtin akk ittḍeggiren lɣaci n taddart-is, netta ijemmɛ-itent ar tberrakt-is, yettales-asent talalit, yettara-tent d tiɣawsiwin n ucebbeḥ neɣ d ssenf n yimrigen yesseqdac lemḥella Afransis di tallit-nni n tegrawla n 54.
Ma nesteqsa Dda Maḥmud ɣef wayen ixeddem, yeqqar-aɣ-d:
<<Bɣiɣ ilmeẓyen n wass-a, akked tsuta id i teddun, wid-nni ur d necfi ara i tegrawla, ad ẓẓren akken Afransis ur aɣ-d-yefki ara timunnent d tikci, aṭas n yi-dammen i yuzzlen deg wakal-nneɣ aɛzizen, aṭas n miḥyaf i iɛeddan ɣef imezdaɣ n tmurt-nneɣ sumata, aṭas i nenɛettab akken ad d-nḥelli tilelli>>. Ass-agi, ad naf yexdem ufus-is ugar n 200 n tɣewsiwin, tabarrakt-is tettak anzi ar usalay amecṭuḥ. Tiddukliwin iqeddcen deg yidles Amaziɣdi temnaḍt-agi n Buzgan, warǧin ttunt Dda Maḥmud, zzgant ssawalent-as akken ad icebbeḥ timzikniyin d tt-heggin yal tafaska, akken ad yernu aɛeqqa n lemleḥ i leqdic-nsen.Dda Maḥmud s lferḥ-is dinna i yella, warǧin yegdil tinnubga, yezga yeḥder netta akked tɣawsiwin-ines di yal tafaska. Ayen yessewhamen ass-agi, ugar n 80 n yiseggasen di tudert-is, Dda Maḥmud mazal iqeddec di tẓuri s tebɣest n yilemẓi n 20 n yiseggasen.
ḤEMMAR BUSSAƐ