Accueil Tamazight “Ayemma γef teqbaylit, ma lluẓeγ ad ččeγ leḥcic…’’

Tarbaεt IDEFLAWEN : “Ayemma γef teqbaylit, ma lluẓeγ ad ččeγ leḥcic…’’

1732
- PUBLICITÉ -

Gar-aγ d kra n lweqt, tarbaεt IDEFLAWEN ad d-tessufeγ yiwen n Album  mebεed mi teqqim ugar n 10 n yiseggasen mebla ma yella-d ujdid.   Nemlal acennay n terbaεt-agi, Ali, deg uxxam n yidles Mulud Mεemmri n Tizi Uzzu anda yella d inebgi n tedwilt ‘’Awal i unaẓiur’’ i d-yettheggi yal aggur Slimane Belharet, newwi-d ula d nekni awal yid-s γef kra n yisental: Album-agi-ines ajdid, ccna amḥaddi gar zik d tura, tizlit taqbaylit di berra d wayen-nniḍen…

- PUBLICITÉ -

Azul a Ali, yella ujdid ?

Ajdid yella acḥal-ayagi ulamma, d ṣṣaḥ, aṭas-aya ur d-nessufeγ ara : ugar n 10 n yiseggasen. Ur neẓri ara ma d asteεfu neγ d iseggasen-nni iberkanen i nesεedda ! Akken yebγu yili, tella dima ssebba acu kan, tarbaεt n IDEFLAWEN ur teḥbis ara ccna u nxeddem timeγriwin dima.

Isental n tezlatin-agi timaynutin.

Am wakken nuγ tannumi, yella ciṭ sya u sya : tajmilt i Muḥend U Yaḥya, i Meksa, asmekti n tgejda n umennuγ γef tmaziγt deg umussu aγelnaw, gar-asen Laïmeche. Mačči d tayri kan weḥd-s. Ad ğğeγ wid ara as-yeslen ad smeḥsen…

Γef ccna-agi amḥadi (chanson engagée), dγa, d acu twalaḍ gar zik d tura ?

Ccna amḥadi gar zik d tura neγ rbeε n lqern akka γer deffir. Mi ara d-nini ccna amḥaddi, mačči kan d ccna aserti. Ma necna γef yizerfan n tmeṭṭut, nekk γur-i d ccna amḥaddi. Ma necna γef wuguren n tmetti, d ccna amḥaddi. Acu imir i nettḥussu kter s yisental-a wama tura. Akka tura, ad nesḥissef imi d wid isellen i yettaken afud i ucennay. D nutni i d-yessifriren win bγan : ma bγan ccna n cḍeḥ, ad yili,ma bγan wayeḍ, ad yili. 

Kečč yellan d iminig, ameki d-tettwaliḍ tamurt n leqbayel ?

Wagi d asteqsi yelhan mliḥ axater ma tebγiḍ ad twaliḍ axxam-ik akken ilaq,ruḥ mebεid, wali-t-id. Mi ara nili di tmurt, am wakka nella ass-agi, yezmer ur nettḥussu ara i lxilaf nettεeci zik akked tura. Alamma neffeγ γer berra i d-nettwali amgarad i yellan gar tmurt-nneγ akked tmura tiberraniyin i yuẓen γer sdat.

D acu ara d-tiniḍ, ihi, γef tezlit taqbaylit di berra ?

Tizlit neγ ccna aqbayli yettwassen di ddunit merra. Ad d-nefk d amedya Idir, ulac anda ur yecni ara,inuda-d amadal d tirni.

Nnan-d d akken s tezlit-ik i yettwamḍel Kateb Yacine, d tidet ?

D ayen yellan, d tidet. Mi t-newwi γer uẓekka-s, nteddu ncennu tizlit ‘’Eğğet-aγ abrid ad nεeddi…’’

Am wakken i d-nnan, daγen, Mulud Mεemmri iḥemmel mliḥ tizlit-a.

Akka. Mi t-steqqsan γef tezlit n ucennay i iḥemmel mliḥ, yenna-asen d tinna n Ideflawen ‘’Eğğet-iyi abrid ad εeddiγ…’’

Txulḍeḍ aṭas Muḥya, anwi icennayen i t-iqurben mliḥ ?

Wid ixulḍen mliḥ Muḥya, yella Idir, Ferhat akked Ideflawen.

Awal aneggaru.

Nessaram taqbaylit ad taẓ γer sdat.

Yesteqsa-t : Hocine.M

- PUBLICITÉ -