Aneɣlaf n uwanak, aneɣlaf n tɣawsiwin n uzɣar d umyalel agraɣlan, Ramtane Lamamra, yenna-d ass n lexmis deg Lezzayer Tamaneɣt d akken ttwenɣen 25 n yirebraben deg Tubiret deg yiwet n « temhelt tabɣast » (takuṛajit) yerna aya d « asurif deg tɣara » ay d-yesskanayen tizemmar n Yigen aɣelnaw aɣerfan d yimeẓla (ssrabes) n tɣellist deg ccɣel-nsen n tɛessast d tukksa n tegrawin tirebrabin.
« Wid yettḍafaren tamsalt-a nnan-d d akken ayen ay d-yellan d asurif deg tɣara », ɣef wakken ay d-yenna Mass Lamamra deg yiwet n tseɣrut ay iga i tɣemsa deg tgara n udiwenni-nnes d tselwayt n Ugraw aɣelnaw n Tegduda taserbit, Maja Gojkovic, am wakken ay d-yenna d akken « d tisigar kan ay d-yeqqimen seg rrebrab deg Lezzayer ». Aneɣlaf yumar (yefṛeḥ) s tezmert n Yigen aɣelnaw aɣerfan d yimeẓla n tɣellist imi ay ssawḍen ad ɛassen yerna ad kksen tigrawin (tirebrabin) yerna yenna-d « aya yesskanay-d d akken Lezzayer tezwar ɣer unrar deg yimenɣi mgal rrebrab ». Aneɣlaf yenna-d d akken tamhelt-a « d tabɣast yerna d taxatart », yerna yenna-d d akken slan yes-s akk medden. « Amaḍal s lekmal-nnes yeẓra s ttbut d akken llant tmura ay yezwaren ɣer unrar deg yimenɣi mgal rrebrab yerna Lezzayer d nettat ay d tamezwarut deg tmura-a », ay d-yenna. Ṣṣenf-a n temhal « yeḥwaj iɣallen uzzigen », ɣef wakken ay d-yenna am wakken ay d-yerna d akken iɣermanen idzayriyen « ttekkan s ubrid-nsen deg ccɣel yekkaten akken ad ifak rrebrab seg Lezzayer ». Mass Lamamra yenna-d, deg temsalt-a d akken « amaḍal s lekmak-nnes yesteɛṛef s tmussni igerrzen n yiɣallen n tɣellist d yigen aɣelnaw aɣerfan deg uxeddim-nsen deg yimenɣi mgal rrebrab ». « D ayen yesɛan azal ma sfaydin-d yidisan niḍen seg ttejṛiba n Lezzayer deg yimenɣi mgal rrebrab, d ttejṛiba ay d-terbeḥ seg wayen ay tefka d asfel seg warraw-nnes », ɣef wakken ay d-yenna.
NSL (APS)