n Rachid BUKHERROUB
Mass BOUKHERROUB d anemhal n tesnawit deg tɣiwant n At Aissa Mimoun. D ameɣnas n tmaziɣt seg tazwara n tudert-is am netta am yilmeẓyen i t-yecban n tama –agi n Wagennun. Yessufeɣ-d adlis ‘’ Tislit n Uɣanim’’ i wakken ad d-yerr tiɣri i yinelmaden i yettnadin ad ɣren idlisen n tsekla taqbaylit. ‘’Ur ufin ara yinelmaden idlisen n tsekla ara d-aɣen. Ladɣa mi akka tettuneḥsab leqraya n yidlisen deg umecwar-nsen. Ɣef wakka i d-rriɣ tiɣri, nniɣ-as ad d-fkeɣ afus n tallelt deg uḥric-agi n tsekla tamaziɣt. Dɣa suffɣeɣ-d adlis-agi i uriɣ acḥal-aya.’’ Akka i aɣ-d-yenna Mass Boukherroub. ‘’Tislit n Uɣanim’’, d adlis i d-yewwin awal ɣef tudert n Leqbayel zik-nni : gar wuguren d leɛwayed ; gar yimɣaren d yilmeẓyen. Adlis-a, yezmer ad yili d yiwen gar ttawil i yinelmaden i wakken ad yesnerni s waṭas deg umawal-nsen imi yettuneḥsab d agerruj n wawalen iqburen. Yeffeɣ-d, yakan, ɣer tezrigin ‘’El Amel’’, 2015, s wazal n 250 DA.
Taɣuri iwatan.
Hocine.M