Aɣmis n Yimaziɣen : amek i txemmem ɣer temlilit am ta ?
Mass Assad : nwala lexsas i yellan deg tɣamsa neɣ deg teywalt s umata, ladɣa seg tama-agi n umawal. Ihi, nerra-t d aɣbel seg lǧiha-nneɣ u nenna-as ad d-nheggi tannant i yineɣmasen iqeddcen s tmaziɣt. Am wakken teẓram, zik ttimint-d kan temliliyin i yiselmaden n tmaziɣt. Nger-d tiɣri i yineɣmasen, usan-d azal n 100 deg-sen. Aya, d ayen yessefraḥen.
D acu n yiswiyen i tgam i tannant-a ?
Mass Assad : deg tazwara, nebɣa d d-nessemlil ineɣmasen i wakke ad nẓer akk uguren i d-ttmagaren deg lxedma-nnsen, xas ulamma neḥṣa s wugur n umawal akked tenfalit imi daymi i d-nhegga kra n yisental seg tazwara. Syin, nebɣa ad d-nessufeɣ sya ɣer sdat yiwen udlis anda ara ilin azal n 850 d awal s tmaziɣt ara yeḥwiǧ yal aneɣmas deg umahil-is. Iswi-nniḍen, d asileɣ deg tesnarrayt n uheyyi n usali n tukkisin n yiḍrisen n tsekla tazzayrit n tmaziɣt.
Anwi i d-yellan deg lmendad n tannant-a u amek i d-yella ufran-nsen ?
Mass Assad : nessawel i yisdawanen akked wid iqeddcen deg uḥric-agi n tɣamsa, wid yesɛan, yakan, tirmit tameqqrant. Am wakken i d-nenced ineɣmasen iqdimen n tmazit.
Amawal-agi, ad d-yili s xemsa (5) n tmeslayin, meḥsub : taqbaylit, tacawit, tacenwit, tamẓabit akked tergit.
Tezmer tmaziɣt-agi ur tt-ifehhem yiwen. Ad tuɣal ‘’D tamaziɣt lfuṣḥa’’. I wacuɣer mačči yal yiwen ad yesneni tameslayt-is ?
Mass Assad : akka tura, yal yiwen ad yexdem s tantala-ines, ad yexdem i yiman-is syin ad nruḥ ɣer usdukkel-nsent s umtawa n yimusnawen. Akka tura, win yekkren kan ad d-yesnulfu awal. Nekni, iswi-nneɣ d akemmel n ubrid i d-yebda Dda Lmulud deg uḥric-agi n umawal…
Ɣef wanect-a, dɣa, anwi ismawen ara yilin deg tesqamut-agi n yimusnawen ?
Mass Assad : akka tura d tasqamut kan n leɛḍil, yella deg Mass Benkhemou, Mass Bali syin ad d-nessiwel i yimusnawen i teɛna temsalt n yal aḥric.
Awal n taggara.
Mass Assad : tamaziɣt teḥwaǧ lehna. Teḥwaǧ afus n tallelt n yal yiwen. Tamaziɣt d lebni ameqqran armi d tura i nettaɛraḍ ad as-nesser lsas. Ihi, nebɣa lsas iṣeḥḥan.
Yesteqsa-t Hocine.M