Accueil Tamazight Yeffeɣ s wayen yelhan usmel n tdukkliwin n Ayt Smaɛel

Yella-d ussan n 28 ed 29 deg ɣuct-a iɛeddan : Yeffeɣ s wayen yelhan usmel n tdukkliwin n Ayt Smaɛel

1727
- PUBLICITÉ -

Taẓrigt tis snat n usmel n tdukkliwin n Ayt Smaɛel i d-yeḍran ussan n sem 28 ed sed 29 deg ɣuct, d tin i nezmer ad d-nini tewwi-d akk ayen ttraǧun deg-s, ama d imsuddsen-is, at umussu adelsan, neɣ d takemmict n yimezdaɣ i iḍefren ahil. Imi segmi ttwasnubegten yinebgawen ass amenzu mettwal 14sr n tmeddit bdant ttbinent-d ssmamat timezwura n wazal n usihar-a. Dɣa syin akkin, yal yiwen yeḍfer abrid n tzeqqa n yilemẓiyen ideg ara ḥeḍren i talilt n uxxam n yilemẓiyen n Txerraḍt (Xerraṭa) akken ad d-tɛeyyen s taldayt send awal unsib n uselway n tɣiwant n Ayt Smaɛel mass Ɛebdun Nasir, lwaḥi ed kra n wawalen nniḍen n yinebgawen. Azal n sin n yisragen (sswayaɛ) aredqal, tebda tezrart n yisaragen-iskasiyen, mi yeɛfes ɣef usayes mass Metref El Ḥasen, i yellan d asemtar n urebbi (conseiller pédagogique) n yilemẓiyen, akken ad d-yawi yiwen n usarag ɣef «umussu asdukklan i uqeddic n tneflit tadigant». D timrac ɣer sdat yelfa-d wakud n usarag «tigawt tadigant akked, daɣen i yilemẓiwen», i d-iga umeɣnas ed uselway n Tdukkla Itri Adelsan n Uqbu mass Mulud Salḥi. Seld (mbeɛd) aḥric-a amenzu n yisaragen iɣef i d-yella ddeqs n uskasi, tella-d tegnit n usteɛfu i tfekka ed wallaɣ send ad yettwasemmed wahil n wass s yiwen n wurar adelsan i d-tga tegrawt n yilemẓiwen i d-yusan seg Leqser. Mi tessulles dayen, yettwasemmed uzekka-tuyen wahil tanezzayt s usarag wis kraḍ s uzwel n «d acu d aḥezzeb i wanwa aṭṭan n tgeẓẓal?», i d-yesken uduktur Anes Fateḥ, d amsujji n tgeẓẓal (Néphrologue) deg txerraḍt. Deffir usarag-a tella-d dindin tigawt n ugmar n yidammen i d-heggan s umɛiwen EPH ed EPSP n Txerraḍt. Syinna rǧan yimeḥḍar almi i d-tewweḍ tmeddit, lawan ideg bdan yiḥuna (ateliers) n usileɣ. Dɣa, d mass Fersawi Ɛebdelwahab i d-igan amezwaru-nni umu yefka azwel «ilemẓiyen ed temḥaddit taɣermant». Ad d-nesmekti belli netta d aselway n Ugraw Tigawt Ilemẓiyen. Aḥanu wis sin d mass Sadeq n Ayt Urbaɛ (Rebbaɛi) i t-id-yewwin, netta i yellan d anmazul (adjoint) n uselway n tɣiwant n Ayt Smaɛel. Yewwi-d Sadeq ɣef «umḍiq n tẓuri ed yidles deg tmetti tamsedrart». Ɣer taggara, d aselway n Tdukkla Tadelsant Adrar n Fad, mass Fares Bakkuc, i d-yewwi asentel ɣef «tetiknikin n uselḥu n tdukkliwin ed yisenfaren idelsanen». Yuɣ lḥal, am deg yisaragen, gren-d iman-nsen wid yettferriǧen s kra n tuttriwin neɣ n tektiwin. Mi yewweḍ akken wakud n tmeddit deg 17sr30, teqleɛ tegnit n waddal mi d-sneɛten yilemẓiyen n terbaɛt tanaddalt tabujadt n Ayt Smaɛel kra seg win mu qqaren Simo Hapkido. Syin ɣur-s, yeḥḍer uzayez i temlilit n ddabex yettferfiren sɣur yinaddalen n terbaɛt tanaddalt tabujadt Itri. Rnu kra akken, d tarkeft Tadukkli n Ayt Ɛisa n Uweqqas i d-yewwin yiwet n tceqquft n umezgun i yehwan i kra n yimferrǧen.

- PUBLICITÉ -

Mi d-tettqarab dɣa temdelt n usmel-a i iɛeddan akken ilaq, tella-d s tegnit n ucmummeḥ sɣur terbaɛt n yimseḍsayen Lewhama deg teɣzi n ddeqs n wakud. Ilaq ad d-nesmekti daɣen belli llant-d kraḍ n temzikknin deg teɣzi n sin n wussan n usmel: timzikkent ɣef usegmi awennaḍan ed unegmu idumen n mass Xaled Fuḍil, i yellan d ajenyur deg tnezduɣt ed wayen yerzan tamdint.. Timzikkent n wallalen n tensafart sɣur tdukkla «Tiɣri» n Ayt Smaɛel. Akked temzikkent tadelsant sɣur Tdukkla Tadelsant Adrar n Fad.

Mhenni Xalifi

- PUBLICITÉ -