Llan kra n yimdanen, nwan awi-d kan ad d-afen tifrat i wugur xas ulamma ad d-xelqen wayeḍ yugaren amezwaru-nni. Ɣur-sen, meɛlic d tayerza n ulɣum, ayen akk i d-yekrez ad t-yerkeḍ. D ṣṣaḥ, imdanen sḥassfen imi iberdan n tmurt ččuren d ammus, uɣalen d igudiyen mebla tilas. Aṭas i yettlummun wid-nni iḥebbsen s ṭunubilat ɣer tama n ubrid, tessen, syin ṭtaǧǧan tiqreɛtin dinna, ttembbabbayent ta ɣef ta alamma tewweḍ d taffa. Aya yettak udem n ddir i twennaṭ akked yimezdaɣ-is. Acu kan, ilaq ad iwali bnadem tidet s yiwet n tmuɣli, mačči s tneḥyaf neɣ s wuden n ddin kan. Ugur n wammus mačči d tamsalt n wid itessen kan, d tamsalt n yimezdaɣ akken ma llan. ‘’Wid itessen, ṭeggiren tiqreɛtin, wid yettẓallan, ṭeggiren iḍuman’’ i aɣ-d-yenna yiwen umezdaɣ.
Llan kra, ɣillen ufan-asen-d tifrat i wugur-a. Kkren ssan akk leryaf n ubrid d tiqreɛtin n lbirra i wakken ur ḥebbsent ara tkeryas dinna. Ɛlaḥsab-nsen, ma ur ḥbisent ara ur d-yettili ara uḍegger n teqreɛtin. Acu kan, ttun yiwet n lḥaǧa : d nutni i yeččuren rrif n ubrid s teqreɛtin, ayen icemten nezzeh iberdan. Ula d wid yebɣan ad ḥebsen ma yettuḥettem fell-asen, ur d-ttafen ara amek, ur d-ttafen ara ciṭ n umekkan ilem. Daymi qqaren : ’’ad yekkat aɣyul, ad yettdari taberda’’.
Yerna, tifrat, tella ɣer tudrin n tmurt n leqbayel. Tella ɣer taddart n Zoubga akked Yigersafen d tiyaḍ-nniḍen. D imedayaten limer yella ‘’cit n ṣswab maḍi, maḍi’’.
Et puis, akken i as-yenna winna :
‘’Ḥemmleɣ tayri d waman ṣemmneḍ,
Ḥemmleɣ ajeǧǧig n tefsut,
Ḥemmleɣ lemwansa n tmeṭṭut.
I merde i win iruḥen,
Ɣer lgirra yegla s tefruyt.
Awit-d un coup, awit-d sin,
Di lxater n wid yemḥemmalen,
Di lxater n wid yessefruyen.
I merde i wid iruḥen,
Ɣer lgirra akken ad nɣen,
Ɣer lgirra akken ad mten.’’
Hocine.M