Teɣli teslent deg Illulen, tḥuza yiwen d Mlikec, d anzi yebnan ɣer tidet ur yekki wammus. Akka diɣ i teḍṛa akked tifranin timnaḍin( éléctions régionales) I d-yellan taggara-agi di Tmurt n Fṛansa.Iṛumyen buṭin, iẓẓiriyen ikecm-iten ihwah akked lḥir am akken i d-yeqqar wawal aqbur : tayaziḍt tettarew, ayaziḍ iqerḥ it uqeṛṛu-is. Ssebba ? Imi d Anyir Aɣelnaw n Marie Lepen( FN) id yezgan d amezwaru deg lbut-agi.
Akken kan id iban wamek ffɣen-t tifranin-agi, yekker wahruḥu akked “qiluqal» deg Facebook akked twitter amzun akken nettales i yifṛansisen amek ara buṭin neɣ ɣef anwa ɣef ara buṭin. Akka akka, wa yenna-k irrumyen d imedɣal tzeddeɣ deg-sen tamsirit( racisme) , ur ḥamlen ara iẓẓiriyen, aɛraben, inselmen. Wihin( deg akken yečča ḥabuṛa) yesfelet agrireb i tmurt n Fṛansa imi agdud-is yedderɣel yezzi s taɛrurt i tugdut . Wayeḍ( deg akken yerfa s yir lbut-agi) yettgalla war yeḥnit ur mazal ad yerkeḍ akal n Fṛansa s-iḍaṛṛen-is skud d akabar-agi n FN i yeṭṭfen zzmam n temsal di temnaḍin n tmurt-agi. Ziɣ nezwar deg tsertit armi i teḍṛa yid-nneɣ am akken is yenna wanzi: “axxam-nneɣ ur d –as nezmir, i lǧameɛ neṭṭef amazir! A buh…
Meɛna tidet ilaq a tt-id yini wemdan: ayen yessawḍen agdud n tmurt n Fṛansa ad yeččeḥ ɣef ikabaren iqburen n llem azelmaḍ neɣ a yeffus d tasertit ḍefṛen ineggura-agi mgal imnigiyen izeḍɣen din-a. Tamurt n Fṛansa ( seg asmi id yeṭṭef adabu François Mittèrand) telli tiwwura-ines i yeɣriben akken ad sɛun nekwa tafṛansist. Di tmuɣli n udabu n Fṛansa d win id abrid akken ad zdin ijentaḍ akked inṣaliyen n tmurt. S wakken-nni ara teddukkel tmeti , imdanen-is a d zḍen lwaḥid ddaw yiwen ubeḥnuq . di nwaya-nsen d tasertit ara yerran i yal yiwen leqder akked lɛezz . Maca asujer -agi yezleg , imi iɣriben-agi yewwin nekwa n tafṛansist , bɣan tsekkurt timalalin: ad ilin d iɣermaniyen n tmurt-nni i ten-ijemɛen yerna ad ḥettmen ɣef imewalen-is leɛwayed n tmeddurt-nsen. S wakka iweqaɛ-itt u suter n yir izerfan( am lebni n leǧwameɛ, tarrussi n lḥijab akked uqendyar, taẓallit deg iberden..) armi zerɛen lxuf deg ulawen n-iṛumyen , yettwalin d akken tamurt-nsen tewwi abrid ɣer usyax ma yella tkamel-akken-nni. Rnu ɣef aya, tixazabiyin id yekkan s ddaw n ufus n rebrab tineggura-agi, dɣa yenfel wayen id neflen.
Amek ara n llum ɣef iṛumyen ma yella tuget deg-sen ugin tisirit taẓzelmat neɣ tayeffust id wwin ikabaren iqdimen( akabar amnay akked ukabar agududan)? Amek ara neččeḥ ɣef fell-asen ma yella bɣan ad teqqim tamurt-nsen d tagdudant, d talaykit, d tafṛansist isenden ɣef yidles amasiḥi?
Meɛna teḍṛa-tt d wigi-nneɣ ( yebɣan ad ilin n d agi yerna n dihin armi celxen iṭṭaren-nsen deg akken i ten-sen ferɛen ɣef snat n tmura) am akken wwin ad yeẓiẓen ɣef taggara yeẓẓel iḍaṛṛen! Ziɣ tamacahut n yifer akked umerɣun mazal tesɛa inumak !
Ait Slimane Hamid