D udem amezrayan n teẓriɣlant tazzayrit, d aɛeggal n tegrawt n tẓa (9) i yellan d ssebba n tnekra n Tegrawla, d yiwen seg yimezwura n tirni akken ad tili tdiplumatit n teslellit yella daɣen seg wid icetlen tanamert seld azarug-nneɣ, Hocine Ait Ahmed yemmuten iḍelli, deg leɛmer-is 89 iseggasen, yella, ulac din ccik, d argaz yessegten imennuɣen.
Dda Lḥusin, am wakken i ḥemmlen ad as-ssiwlen yimeɣnasen n Tirni n yiɣallen inemlayen (FFS), d tazmert tamezwarut n tnamert i d-yeɣnew umeɣnas-a ur nfeccel seg newwi azarug, yuki-as i teẓriɣlant ɣef zik lḥal. Deg Ukabar n uɣref azzayri (PPA), i d-yeɣnew Messali Hadj, udem ameqqran n teẓriɣlant tazzayrit, i yelmed izalen n tlelli akked wid n nnif akked lḥerma n umdan, d izalen werǧin ten-yeǧǧa nejren abrid-is abaɣut s yisem-is d argaz asertan ttqadaren. Yekki deg uɣnaw n Tuddsa tuzzig (OS), d taɣbalut n tidet n yimeɣnasen imaẓriɣlanen i cetlen deg tetwilin n yimenɣi, i yuɣalen sakin d ikataren n tegrawin n Yigen n teslellit Taɣelnawt (ALN), Hocine Ait Ahmed, ur iɛeṭṭel ara yezzaken-d tazmert-is n umsuddes, netta deg leɛmer-is 20 iseggasen.
D anelmad deg tesnawit yewwin lewhi n uɣella asertan
Ur yettɛeṭṭil ara ad iban fell-as belli d aɣella asertan, netta mazal-it deg tesnawit n Ben Ɛeknun, ɣer tama n yimeɣnasen imaẓriɣlanen ara d-yeǧǧen later deg umennuɣ i teslellit n Lezzayer, gar-asen, Omar Oussedik, Benaï Ouali, Amar Ould Hamouda, Chibane Saïd akked Idir Ait-Amrane. Yeṭṭef, seg iruḥ Mohamed Belouizdad, tamehla n Tuddsa tuzzigt (OS), d yiwet n tuddsa ideg yella d amsuddes igerzen yerna d aɣella n tidet, acku, d netta i yessufɣen attafttar n telɣut taserdasant i ferqen i wakk imekkiyen n tuddsa taserdasant.
Dindin gren-as tamawt, deg temlilit n Useqqamu alemmas n ukabar n PPA, deg useggas 1948, deg Zeddine (tama n Cclef). Tikkin-is s tirawt, ideg tella tmuɣli-s ɣef tsetratijit n umennuɣ iɣef yessefk ad yeddu ukabar n PPA, yessebgen-d dɣa imal aɣelnaw i yellan yettraǧun ilemẓi-a yesɛan deg leɛmer-is, deg tallit-nni, 22 iseggasen, d abrid yeččuren d uguren, seg gar wuguren-nni d tazɣint i umi ttinin « Taẓermazɣant » n useggas 1945. Uguren i d-yemlal deg ukabar-is ur nnulen ara beɣɣu n umsedrar n Ɛin Lḥemmam, deg tmurt n leqbayel n ufella, yetturebban deg tnemgalt n ulmad n teẓriɣlant ɣer tama n wudmawen imeqqranen n umennuɣ ɣef uzarug n tmurt. Ar ass-a, 53 iseggasen seld azarug, mazal inmazrayen ssekfalen-d ddeqs n tɣawsiwin yefren n umennuɣ n Hocine Ait Ahmed ɣef tmurt-is, ideg yella yinig-is ɣer asya i yebdan deg useggas 1953, akken ad yeɣnew iseqquma ara iɛiwnen akken ad tawi Lezzayer azarug-is, dɣa, deg tikkin-is deg usarag amezwaru n yikabaren inemlayen n asya deg Rangoon deg Birmani. D aɛeggal n tegrawt n tẓa i yellan d sseba n tnekra n umgaru n teslellit taɣelnawt, mi yella deg Lqahira, netta akked Mohamed Khider akked Ahmed Ben Bella, d netta i d aɣella n tmagla n Tirni n teslellit taɣelnawt (FLN) deg usarag n Bandung deg useggas n 1955. S ɣur Mustapha
Ait Mouhoub(APS)