Belqasem Saddur d aḥeddad ilulen deg useggas 1948 di taddar n Tabunt i yettabaεen taɣiwant Ukeffadu. D igellil , d amɣid , bab-as yemmut yeğğa-t-id akken d aqrur ur yesεi amraw , yemma-s tuɣal s axxam-nsen. Dda Belqasem yufa-d jeddi-s d amzil d win ixeddmen aderreq di tama n Mezgug ,din i yelmmed tinḍi-a ,yesεedda ɣur-s tanant asmi yenfel deg uwtay 14 n yiseggasen , yettεawan-it deg umahil aya deg tmunent n tgaluft tazzayrit 1962.
Ddeqs kan yemmut jeddi-s , lḥif , laẓ , asemmiḍ ur t-yezgil , acu kan ɣur-s tamesɣara yelmmed ɣer uselmad-is , qqaren s umegda «lğehd n uberreq, yettuɣal d amzil» yexdem ɣer Ḥammu aḥeddad deg At Weɣlis kra kan n yiseggasen , iḥulfa iman-is yezmer ad yennefti deg usaḍur-a , yelli tazeqqa n uberreq deg Ukeffadu di taddar At Sεada amḍiq At Ԑemran deg useggas 1979, imiren ur caḍen ara imzilen deg lεerc At Mensur yella Smaεil aḥeddad di Lqalεa n Yikeğğan d ṭaher di Tifra akk Sidi Mḥend amzil d win yesselqamen uzzal-is bɣir afḍis di temεemmert n Silan. Yuɣal d amagnu , d axeddam yettekes-d aɣrum-is, di lweqt-nni ugten yifellaḥen , ttawin-as-d tiɣawsiwin icudden ɣer tfellaḥt amedya tagersa , agelzim, aqabac… d tisemmrin n uɣyul akk d wallalen n lebni ,netta it-seggim-iten.Amahil d agensas tafḍist ur trekked seg tuddza ɣef zzebra, akken yettawi asefru umzil n lqalus :
Xedmeɣ i medden lxir
Nekk d aḥeddad si lqalus
Ul-iw i ttagwem ineqqel
Aṭan di lhem ur ixuṣ
*At Mraw akud At Ԑaṛus
Aqli-n neğğreɣ azedduz
Ayat Rebbi get-as afus.
Dda Belqsem yessexdam allalen uberreq , lkir d win i yettaken azwu akken ad yecεel ufarnu deg uɣrud , uɣrud d lfur uḥeddad din i yecεlay times s cerbun ,zik s uzeqqur n yimesleḥ , yesseḥmay uzzal deg-s akken yeqqar dda Belqasen «uzzal ijebbed deg uzɣal» mi ara yesseḥmu uzzal-nni yettekkes-it-d s tɣemdin d timyaṭṭafin ayen yeḥman ,syin ad ires ɣef zzebra , tafḍist ad t-seggem uzzal-nni ixesren ,yessemsad-it yettara-t-id d amaynut , yessmukun-d daɣen tiɣawsiwin s ɣur-s.
Yemmed amahil-a armi d aseggas 2008 syin teddrem tεecciwt-is anda i yebna timeḍḍirt-is , yeḥbes kra n wagguren , yuɣal ibeddel tadala deg Ferḥun ar ass-a din i ixeddem, aɣyul-is yeqqen-it ɣer tefga n thatimt netta yettsemmir s daxel , yewwi-d tasteɣt si zzman , yexdem ugar n 45 yiseggasen , d acu kan mazal yettemmid ar ass-a tanga-a , d leḥmala-s , d azerruy i as-d-yeğğa jeddi-s.
Belqasem aḥeddad d tawrikt ikesben tasnagt, daymen d amaha ɣer tinḍi-s , tanezzayat uqbel ad d-tali tafukt d ayen iḥerkel iman-is ɣer usemmeṛ , tamseɣara-ines d tazzagert , acku ɣur-s tirrut , ɣur-s 8 dderya akken qqaren at zzman “yessers uḥeddad afḍis, irfed-it mmi-s” , d acu kan ur yelli waya , tarwa-s ugin ad ṭṭfen adeg n bab-t-nsen , asaḍur-a d tamussni , d tamaḍirt d tarrayt, d taneftit ,d asisen …..
“ Tasemmunt n uḥeddad , d tafḍist n wuzzal”
Azedine Abdous