Di yal tallit, di yal tamurt aferdis amezwaru ɣef acu tbedd tadamsa( économie) d tafellaḥt. Yal lqum i tetten ayen ur d iḥar-ara , leqrar-is d tlaba, akked d ucuḍ ɣer uzbuq n nnger. Akka ula deg tallit –agi tamirant anda tagula tikwal tettili d leslah gar ifassen n tinezmarin tidamwsiwin( puissances économiques). Aya neẓra-a acḥal d abrid, imi yal tikelt deg timura-agi umi teǧǧḥed tadamsa seqdacen rhina n tagula ( le chantage alimentaire) i wakken ad seknunt neɣ ddilent timura grent gar w allen-sen-t. Amedya aneggaru d tifegwit tadamsant (sanction economique) weqment timura n tidukkla n Europe mgal tamurt n Rrus s ssebba n taluft n tmurt Lukraniya. Anect-a wehḍes yessebgen-d azal tesɛa tfellaḥt t deg useḥbiber ɣef lḥeṛma akked leqder n timura. Win izemren ad iniwel tarbut-is s yiman-s werǧin ad yesqizzib i lǧar-is , am akken id yenna lemtel. Taluft n tagula si zik is kkren imawlan-nneɣ imi qqaren deg awal: “ axxam-is ur as yezmir , ɣef lǧameɛ yeṭṭef amezzir.”. Qqaren diɣen:
“ tis sebɛa seg lmeɛnat aya n lxiṛ d aṛeṭṭal win izerɛen di lǧil yufa-t Ɣer leǧwad ad as yuɣal”.
Tidet ɣer yifen yal tidet imawlan-nneɣ d akal. Nnif d axxam. Lɛaz d lḥeṛma. Ɣef aya ur ilaq ara ad aɣ teḍṛu am win yellan deg axxam , ma d nnif-is yeǧǧa-t di ssuq, neɣ am win yellan di ssuq , nnif deg uxerduq. Ur ilaq ara acku taqbaylit teqqar: ttif lmut di nnif wala tudert di lḥif. A n t-ixf-is ugdud yezzin s uɛrur i wakal. A nnger-is lqum yettun ad yerr tiseɣlit ɣef iqwiren? A lhemm-is waɣref yettun anamek n wurtan. Aḥlil-is tasuta yettun belli qettu d aɣuru, a zreɛ d ddwa ḥellu. Tafellaḥt d tijegdit n yal tadamsa di yal tamurt. Ɣef aya timura ineflen akkin ggan-as leqrar. Tafellaḥt am yal aḥric di tdamsa tesɛa illugan-ines. Tamussni-ines akked tussna –ines. Iferdisen-agi simmal tettaẓ tamussni ɣer zdat simmal ttembaddalen akken simmal akal ad yefk ugar n lɣella. Lɣella ara yeččaṛen adamus. Ɣef aya, ass-a nettwahim ayen iɣerbazen n lḥirfat ( CFPA) ur sɛin ara tigezmiwin ( sections) yeɛnan tatiknulujit n tfellaḥt. Tasuta n wass-a ur tesɛi ara afus yettleqqimen , neɣ yesnen i wafras n isekla. Arrac-nneɣ ur ẓrin-ara amek ara reklen tigusa deg akal. Amek ara fernen tiskar id yettawin igeḍman n leḥlu . Iṛuḥ-asen w-aya acku tasuta teqburt ur asen tesselmed ara amek d acuɣer n wencet-a. Wamma d deg iɣerbazen leqṛaya icuden ɣef wakal d lqifar. Xudi ha-ten acu id yenna umedyaz ɣef iɛebden aɛeddaz:
“ lemmer s unyir i tkerzeḍ nneɣ ɣef tigecrar I tzerɛeḍ tili ha-ten yemɣi-d yal lxiṛ.”
I wacu ara d yesseɣres meɣṛes ma yella ur d nhegga ara tiregwa? I wacu agani n igefuren ma yella ur yenqic ara wakal? Amek ara telhu lliqa di tzemmurt ma yella meɛwaju i tefres? Tazemmurt akken ttaɣ leqrar ilaq ad tili d tanaṣlit acku tazemmurt s isem-is id awal-is. Di tzemmurt tella tezmert tella tmurt!
Ait Slimane Hamid