Mi tga tɣiwant anejmuɛ-is ansayan tikkelt iɛeddan, iɣer ttwaɛerḍen yimezdaɣ, at umussu asduklan, akked yineɣmasen, aṭas i d-ibanen tthennan, wiyaḍ ssaramen belli taɣiwant-nsen ur as-mazal xilla ad tekcem dayen tawwurt n tneflit (développement). Aya mi d-sneɛten yimḍebbren n tɣiwant tiṭ ɣef liḥala n yisenfaren-is; anda kkan yiqburen, ed melmi ara sqelɛen imaynuten i yettwajerrden yakan. Deg umeslay, yella-d usenned ladɣa ɣef kraḍ n yisenfaren d imeqqranen; winna n usiweḍ n waman seg Lɛenser Azegza, axdam n ubrid ɣer Uweqqas seg Tecruft ed Kefrida, asekcem n ugaz n lḥiḍ i yixxamen, akked useggem n yiberdan n Taɛisert-Tigratin-Lmerj n Yiɣil, ed winna n Taregragt-Bumejber-Burafaɛ. Ma nemmeslay ɣef umezwaru i d-nebder, i yeɛnan taɣbalut n tudert, ɣef wawal n uselway n tɣiwant n Ayt Smaɛel atan yettwajerred tura, qqiment-d kra n tigawin akken ad t-sqelɛen. Abrid n Tecruft kifkif, i ttraǧun yimezdaɣ ad yekfu war ssber, mazal-as kan assaw n ugidrun imalasen (semaines) i d-iteddun. Qqimen-d yisenfaren n uqqan n ugaz i tnezduɣin akked uqeɛɛed n yiberdan. Dɣa, imi i d-dukklen akken wa deffir wa, ilaq tazwara ad mmagen yiqadusen n ugaz abrid abrid ddaw tmurt send ad asen-tettwaxdem tduli s ugidrun. Ad d-nesmekti ɣer taggara, belli yella-d deg umsegraw umeslay ɣef waṭas n yiqeddicen, i wa ileḥḥem, wa deg ubrid!
Mhenni Xalifi