Deg ussan-a i d-teddun ad d-yeffeɣ udlis ara yezdin “tanfult n tazrawin n tmaziɣt”(bulletin d’études berbères) sɣur tiẓrigin Amar Achab. Azal n udlis agi meqqer mačči d kra, acku ad yezdi merra uṭṭunen ( seg yiwen alamma d 12) id yeffɣen gar useggas 1973 armi d 1977.Am akken neẓra tanfut-agi tella s ddaw amezday n tazrewt tamaziɣt n tesdawit n Paris VIII- Vincennes. I w-akken ad tishil taɣuṛi n isebṭaren yellan deg zzmam , amur ameqqran seg tewriqin-is yettuɛawed-asen-t tira ( uran-t s wudem atrar) ama deg ayen yeɛnan asekkil neɣ tirawalt( ortographie). Amaynut diɣen deg tḥawact-agi n tezrawin d akken amsizṛeg( éditeur) yerran ismawen n imawalen n isebṭaṛen yellan deg tanfult –agi imi niqal deg azmam anaṣli ulac azmul-sen ( signature) . Xuḍi nekni s tsuta n tafsut n 80 nectaq( di lawan-nni) ad naf tizrawin-agi i tɣuri imi medlen fellaɣ meṛṛa tiwwura. Nectaq a nɣeṛ ayen iɣ yecqan xas akken nfud tamussni , xas akken nereɣa a nissin ugar ɣef yiman-nneɣ, ɣef yidles-nneɣ , ɣef tjaddit-nneɣ. Deg lawan- nni, ddaw leḥkem amesbaṭli n Bouemdienne tamaziɣt ala win yellan d ameslub ara yeḥnunnfen ɣer ɣer-s. Ismawen am wid n Mouloud Mammeri, Slimane Azem, Besaaud Mohand Aɛrab, Salem Chaker, Taous Amrouche, Lmouhoub Amrouche … d leḥram d aseṭṭaf a ten di yedder umdanen. ( lehdur-nwen s ddaw ufus i tt-ɛeddin…id yenna Lounis Ait Menguellet). Deg lawan-nni teẓmek si yal tama ɣef teqbaylit , wamma isem umaziɣ win it-id yudren amzun ihudd aɛessas. Ɣef aya asenfaṛ-agi n wezrireg n tizrawin-agi yussa-d deg lawan-is deg amkan-is ( imi aql-aɣ ɣef tewwura n tafsut n imaziɣen akked tafsut tberkant) akken imeɣṛiyen ( wid ur nessin ara tizrawin-agi) ad mmɣen deg tussna-nsen, ma d wid i ten-yeɣran( s wudem uffir ) zik-nni ad ɛiwden tyessawt deg isebṭaren ara ten id yesmektin acu tura Mbarek Redjala, ,Mohya, Boussad Ben Belkacem, Hend Sadi, Said Boudaoud, Remdane Achab, Mohand Ouamer Ousalem, Said Yacine, S Mou nira. Ɣef aya azal n wedlis agi yekka-d deg aṭas n tamiwin: tamezwarut d -a sekfel n imenɣi n imezwura ɣef yidles amaziɣ( aqbayli) imi aṭas n tanagiyin( témoignage) i yellan deg adlis ( amedya amek di tella tsuqqilt n tmezgunt n Kateb Yacine : “ Muhend ddem tabalizt-ik akked tallalit n tarbaɛt umezgun yuraren tamezgunt-agi s teqbaylit…) , t-is snat d-smekti n kra n win inudan amek ara d yernu tehajjurt-is ɣer lebni n tamagit-nneɣ ( amedya Ben Mohamed, Muhya, Remdane Achab, …)tis tlata amezday-agi n kra n w-ayen yak yuran s wudem uffir deg lawan-nni ( iseggasen n 70) ɣef yidles nneɣ yussa-d akken ad yili d rkiza i kra win yebɣan ad yissin ugar ɣef amek yelha leqdic ɣef tutlayt-nneɣ: amek tella s anda tewweḍ deg ass yecban ass-a. Mebla ccekk imeɣṛiyen n tmaziɣt (deg tesdawiyin) aṭas n tmussni ara d megren seg adlis-agi, am akken diɣ kra n win iḥamlen teqbaylit aṭas n wayen yelhan ara t ihuzen asmi ara yedlu ɣef leqdic-agi . Ɣef aya asenfar –agi n tizrigin Remdane Achab d win id yellan di lawan akken ad yeḥyu n umennuɣ ɣef yidles nneɣ nekni yettheggin iman-nneɣ akken ad neḥyu tafsut n tmanyin akked tafsut taberkant. Asfilet-nneɣ diɣen d wagi : lemmer tiẓrigin-agi ad alsent I umawal n Dallet s tira teqbaylit tatrart imi ula d win d agerruj yettraǧǧu s ccuq yal aqbayli yesexdamen taqbaylit-is I lmendad n teqbaylit
Ait Slimane Hamid