Sed-a (ssebt) iɛeddan, 14 deg wayyur n mayu, i d-tella teẓrigt taneggarut n temliliyin n tmedyezt n Bgayet i tsemhuyt-a (saison), ideg d-ttwaɛerḍen kraḍ n yimedyazen izwawen: Samira Mehdi, Ǧilali Xaled, ed Salim Benxlifa. Ddeqs n wayyuren tura segmi ẓẓan tikti-ya sin n yimeɣnasen, Buɛlam Messusi ed Kader Saǧi, aṭas i walan timliliyin-a d tid i d-yewwin ulama d kra n ubaɣur i umedyaz, skud yessawaḍ yettmagar-d win umi d-yeqqar tiktiwin-is; i yellan d azayez. Dɣa, ɣef wawal n Messusi Buɛlam, yiwen seg yimekfaḍuyen n temliliyin-a deg uxxam n yidles Ṭawes Ɛemruc n Bgayet, d winna gedged i d iswi n usuddes n ttiɛad-a; d asileɣ n uzayez ara iḥemmlen tamedyezt sey-a ɣer sdat, akken i d-yenna. Ilaq ihi ad d-yini yiwen belli tiẓrigin-a wwint-d i wugar n 14 n yiḥeddaden n wawal i yekkin deg-sent, ulama acemma seg wayen ssaramen. Ɣas ma tuget seg-sen ttwassnen, maca ufan tagnit ideg ara yettwasenqeḍ uqeddic-nsen, ideg ara zzenzen daɣen kra seg yidlisen-nsen. Seg tama nniḍen, yella yiwen n ugraw n yimedyazen yezdin, i d-yennulfan ilindi seld tadyant n Mɛetqa, i ahat ɣran-tt kra ussan yezrin deg yisebtar-a. Imedyazen-a ssuturen ladɣa ad as-yuɣal wazal i tmedyezt am tẓuriwin nniḍen yecban ccna ed umezgun. Imi ma nuɣal-d i wawal n yiwen seg yiɛeggalen-is, mass Salmi Musa, timliliyin-a n Bgayet ad rnunt lḥif i tmedyezt ed umedyaz skud ttilint-d ddaw leɛnaya n uxxam n yidles war ma yettunefk-as kra ɣef tẓuri-s. Am wakken ara yili lḥal lemmer d timliliyin n ccna, n umezgun, neɣ ulama n ccḍeḥ! Ɣef taluft-a ihi n waddad n tmedyezt tazwawt, neɣ tamaziɣt s umata, i ara yeɣzif wawal. Imi amcawer fell-as yessefk s uzrab, ɣur yal idis!
Mhenni Xalifi