Accueil Tamazight Acimi diri-ten lehyuf i tezmert n umdan d tmetti-ines?

Lehyuf : Acimi diri-ten lehyuf i tezmert n umdan d tmetti-ines?

14523
- PUBLICITÉ -

Lehyuf d ugur n yal timetti deg umaḍal ass-a, ulac tamurt yezgel, u tamurt-nneɣ d yiwet seg-sent. Imi Taxxamt Taɣelnawt n Usnerni n Tedwest d Tezrawin «Furm», tefka-d leḥsab n 30% n yinelmaden n uɣerbaz alemmas (C.E.M), d wid n tesnawit iḍefren abrid-a n lehyuf. Ugur-agi iḥuza s waṭas ilmeẓyen, ama d arrac ama d tullas. Ihi acuɣer d iεrimen i yettḥaza ugar n wiyaḍ? Ayɣer ur yelhi ara i sseḥa n umdan d tmetti-ines? D acu n yifukal i yezmer ad yefk I umdan? Timental i yettağğan aṭas n yilmeẓyen, ad aɣen abrid-agi n dir mačči d yiwet, gar-asent:Tamezwarut: imi llan kra n yiεrimen i d-ittmagaren uguren di tmetti, yerna ur d-asen-nezmiren ara. Md: berru n yimawlan, iɣeblan n tudert, tayri (…),dɣa ṭṭafaren-t. Γef leḥsab-nsen ttkkeyyifen-t, iwakken ad ttun iɣeblan-nsen. Tis snat: llan wid iwumi ttenṭṭaḍen sɣur imeddukkal-nsen, neɣ s nnefḥa, akken ad ten-εerḍen, dɣa alamma neṭṭḍen-ten. Ma d ayen yeεnan lemḍerra swayes id-gellun, ad naf: Deg tazwara: tissit n lehyuf s yal lesnaf-is: (ccrab, lkif, ccira, kukayin, ẓẓeṭla, tisegnatin, tikaciyin, dexxan…), tgellu-d s txessart d tameqqrant ɣef sseḥa n umdan. Imi swaɣayen neɣ sdubuyen ixef n umdan i ten-itessen, imi daɣen ssenqasen ccfawat deg wallaɣ n bunadem, yerna ssefqqaεen-t bihbih. Win urzen lehyuf, ttaran-t am umeslub neɣ am uderwic, ur yeẓri ara d acu i ixeddem di tallit-nni. Tis snat: gellun-d s twaɣit ɣef tezmert n win iten-iḍefren, imi win iten-issexdamen ineqqiman-is s yiman-is. Acku gellun-d s waṭas n waṭṭanen yecban; Sidda, lkunsir, xelḍen d yidammen n umdan, aṭṭan n turim… Tis kraḍet: amdan iεebden lehyuf, neɣ win iwumi yekcem deg yidammen-is, ala fell-as ara ixeddem, ur yettwali la tarwiḥt-is, la tawacult-is, wala timetti-ines. Ad d-yaf iman-is ur iḥriz ara la lğib-is, la tadwest-is. Tis ukuẓet: yezmer ma yeṭṭef-it lḥal, ur yesεi swacu ara d-yaɣ asafar-a, yezmer ad d-yaker, neɣ ad ineɣ medden ɣef liğal-is. Imedyaten ggten deg wayen yeεnan anect-a, imi yal ass nsel neɣ neqqar deg yiɣmisen, tidyanin yecban tigi. Aṭas i yenɣan imawlen-nsen ɣef yiεeqqaren-a, uɣalen ggran-asen-d wussan deg leḥbus. Tis semmuset: wid I ten-itessen, gellun-d ula s txessart ɣef tezmert n tmetti, imi ur ṭṭurun ara kan iman-nsen, maca ṭṭurun ula d imdanen yellan ɣer tama-nsen. Ladɣa de gyimukan iɣelqen, ur ten-ikccem ara wuzwu. Tis sat: ula d timetti ur d-as-tetteg ara azal wala ccan, I win i tebεen abrid-a. Imi ad d-yaf iman-is weḥd-s kan, yerna ad t-id-tettwali tmetti-ines s yir tamuɣli. Tis ṭamet: imdanen-a gellun-d s twaɣiyin ula ɣef ugama d twennaḍt, acku mi ara iḍeqqer yiwen lbunt n yiggirru neɣ tisegnit ɣer wakal, ad t-tḍur. Ma yella daɣen iḍeqqer-iten ɣer waman, ad ten-issimes ula d nutni.Ihi taggrayt n wawal d ta: yuwi-d ɣef yilmeẓyen-a yesnuffuren isafaren-a, ad ten-ğğen, ma bɣan ad sseḥbibren ɣef tdawesa-nsen, ɣef texriḍt-nsen, ɣef twenaḍt-nsen (…). Γurwat a medden lehyuf d acengu i ineqqen neɣ d lmut iḍulen.«Asseḥbiber xir n udawi»

- PUBLICITÉ -

ADAOU Abdelghani

- PUBLICITÉ -