Teggar-d tiɣri Tidukkla Tadelsant Smaɛil Azikiw i yiḥeddaden n wawal ma bɣan ad kkin deg tfaska n tmedyazt tamaziɣt Smaɛil Azikiw deg teẓrigt-is tis kraḍ, ara yilin seg 4 ar 6 deg ɣuct i d-iteddun, deg taddart Tawrirt n War, taɣiwant n At Ziki. Wid iwalan seg yimedyazen teɛna-ten temlilit, ilaq kan ad aznen kraḍ seg yisefra-nsen, akken yebɣu yili usentel, ɣer tansa-a taliktrunant: [email protected]¬m. Akud n uceyyaɛ yebda yakan seg 5 deg yunyu alamma d 10 deg yulyu 2016. Ma d isuḍaf n uttekki, ad nebder gar kra amdur (leɛmer) n yimekki i yewwi-d ad yesɛu nnig n 18 n yiseggasen, akked yisefra ɣef i d-ssutren yimheggiyen ad ttwarun s tmaziɣt tamirant s wallal n uselkim. «Aql-aɣ s yisem-nneɣ d iɛeggalen n tidukkla nettheyyi-d ayen akk ilaqen iwakken ad tɛeddi teẓrigt-agi akken iwata lḥal, di sser d liser. Nessaram d ayen ara yilin akk di lebɣi n wid akked tid ara d-yerzun. Akken diɣen nessarem akka si teẓrigt ɣer tayeḍ ad yettili umaynut ara yesnernayen tamedyezt tamaziɣt». Akka i d aɣ-d-yenna uselway n tidukkla tadelsant Smaɛil Azikiw, Mass Djilali Hadouche. Send ad d-yernu : «seg tama-nneɣ, ad d-nefk mebla ceḥḥa akud d ljehd-nneɣ, ama d iɛeggalen n tidukkla Smaɛil Azikiw neɣ d imezdaɣ n taddart Tawrirt n War, akken acemma ur yettxassa imedyazen d yimeɣnasen-nneɣ. Ar taggara ad d-iniɣ ansuf akk s tid d wid ara d-yerzun ɣer tfaska-a !». Ttiɛad yettunefk ihi i kra n win yettafen iman-is deg temliliyin i yecban ti, ideg ala din i yettaf umdan tilelli-s n wawal sdat uzayez.
Mhenni Khalifi