Anwa aqbayli ur nessin ara Mass AmedNekkar. D amedyaz, d anagal, d amaru ameqqran n tsekla tamaziɣt tatrart. D yiwen seg tigejda n yidles amaziɣ, swayen id-yeffka i tutlayt n tyemmat tamaziɣt d tsekla-s.
D yiwen gar yimedyazen neɣ imaruyen i yefkan ruḥ-is i tmedyazt d wungaln teqbaylit neɣ n tamaziɣt s umata. D yiwen gar wid-ak i yettnaḍaḥen I wakken ad tekkes tagut d tatut d uɣebbar yulin idles amaziɣ. D yiwen seg yimenza i d-yerran i tiɣri-nni n tefsut n 80. Iban-d aṭas ɣer unnar n tira deg yiseggasen n 2000, ass-a ɣur-s amecwar ɣezzif degtsekla tamaziɣt.n Ahmed Nekkar,ilul ass n 13 deg waggur n meɣres 1955, degUԑfir n Delles deg lwilaya n Bumerdas, di tmurt n Leqbayel. Deg uḥric n tira, yeqdec deg waṭas n yiḥricen-is yemgarden, xas ma yebda s tira n yisefra d tmedyazt u mazal-t deg-s ar ass-a. Imi yebda tira n yisefra deg yiseggasen 1972-1973, asmi yella yeqqar deg tesnawit “ Ʃebdereḥman Illui” deg Larebԑa n At Yiraten. Yura daɣen 4 n wungalen s tmaziɣt, d kra tullisin d tmucuha. Ma d tamentilt I t-yeğğan ad yeḍfer abrid n tira, d iḥulfan-is d wayen akk yettidir d wayen yettidir deg tmetti. Am wakken diɣen yeqqar aṭas n yidlisen n yimyura ama d wid n da, ama d iberaniyen. Seg useggas n 1999ar ass-a yesazreg-d 07 n yidlisen s tmaziɣt; 4 seg-sen d ungalen s tutlayt n tmaziɣt, amenzu yella-d usuffeɣ-is deguseggas n 1999, iwumi isemma «Yugar ucerig tafawet», id-yeffɣen ɣer tezrigin “Yuba wis sin”. Ma d wis sin d ungal daɣen, isemma-as: »Gar ẓẓebra d yifḍisen », yesazreg-it-id deguseggas n2012, ɣer tezrigin “le savoir”. Ma d ungal-is wis kraḍ (03) « Tajeğğigt n Meɣres » yesuffeɣ-it-id deg unbir 2015, ɣer tezrigt-is “Tamagit”. Ungal-a d tasuqqilt i wungal n “Moussa Bouchakour” s uzwel-is anasli “Rencontre inattendue”. Ma d ungal-is wis ukuẓ (04) iwumi yefka azwel “Aẓeḍḍa n Tissist», i d-yeffɣen deg 13 Yebrir 2016, ɣer tezrigt-is “Tamagit”.Yesuffeɣ-d s yiwen n udlis, llan deg-s snat n tmucuha: tamezwarut isem-is “Tageldunt deg uglim n ujḥiḥ», ma tis snat isem-is “Amettaker asadaran”. Yeffeɣ-d deg 2015 ɣer tezrigt-is (Tamagit). Yerna yesazreg-d yiwen-nniḍen n tullisin ideg llant daɣen snat n tullisin. Tamezwarut iga-as azwel “Taɣaḍt n Mass Seguin” d tasuqilt i tullist-nni n Tefransist “La chèvre de Monsieur Seguin”. Ma tis snat-nni isem-is «Isegbazen n tedyant n Stéphanie Benson». Ula d adlis-a yeffeɣ-d ɣer tezrigt-is, deg useggas n 2015. Yura, daɣen, yiwen n udlis n tɣuri «Adlis n tɣuri- Iluɣma d yisnasen» i yinelmaden n uɣerbaz alemmas d wid n tesnawit. Yeffeɣ-d yakan deg useggas n 2013 ɣer tezrigt “ La pensée”. Ahmed Nekkar ha-t-an la yettheggi aṭas n yidlisen gar-aes: ungal n “Alis deg tmurt n tirga”. D sin yidlisen i ulmud n tmaziɣt, i wid ur nessin ara tamaziɣt. D yiwen n umawal n tmaziɣt d tefransist.
Adaoun Abdelghani.