Accueil Tamazight Aḍar iteddu s aẓar.

Lewziɛa deg Tuddar

Aḍar iteddu s aẓar.

1922

‘’Yuɣal-d sser tamurt’’, d tanfalit-a i yezgan, ussan-agi, deg yimawen n yimezdaɣ n tmurt n leqbayel. Awalen-a,qqaren-ten imi i d-tuɣal lewziɛa i yellan, seg zik, d lɛada ɣur-sen, xeddmen-tt deg wass lɛid tamecṭuḥt.

Mebɛed mi teḥbes ugar n 15n yiseggasen-aya, ɣef sebba n tmenɣiwt n Matoub, tikkelt tamezwarut, syin ɣef tefsut taberkant deg useggas n 2001, ha-tt-an ihi, tuɣal-d lewziɛa ɣer taddart n Tala Athmane i d-yezgan deg tɣiwant n Tizi Uzz. Am yal taddart n tudrin n tmurt n leqbayel, taddart n Tala Athmane xedmen lewziɛa ass-nni n Lɛid tameẓyant deg sin yimekwal : Taddart Ufella akked Taddart Bwadda. Zlan 8 n yizgaren. ‘’D ayen yessefraḥen imi nuɣal ɣer tjaddit’’ i aɣ-d-yenna Dda Muḥ. Fkan yimezdaɣ ttiɛad ɣef 11 n yiḍ ɣer tlemmas n taddart anda mlalen s umeẓẓyan d umqqran, s wid izedɣen deg taddart akked wid i d-yusan seg berra, rzan-d ɣer taddart-nsen ass-agi n leɛwacer. S lmendad n yimɣaren yuɣen tannumi s lewziɛa, kkren yilmezyen n taddart-a, zlan 8 yizgaren u ferqen-ten d tisɣar : 491 n tesɣar deg Taddart Ufella ; 209 n tesɣar deg Taddart Bwadda. ‘’Tikkelt tamezwarut ara ḥedreɣ i Lewziɛa. Ẓriɣ-tt kan deg Facebook ɣer tudrin-nniḍen.’’Akka i d-yenna yiwen ilemẓi n 15 n yiseggasen. Ula d arrac imecṭaḥ, sɛan azal d ameqqran ass-nni n tmecreḍt imi keccmen ɣer Lewziɛa u ttawin-d iɣes. Akka ay tella d lɛada ɣer leqbayel. Ass-nni n lewziɛa, ad yawi ubabat mmi-s amecṭuḥ, ad t-yessekcem, i tikkelt tamezwarut, ɣer lewziɛa i wakken ad t-issinen yimezdaɣ n taddart. Mi d-yuɣal, ad d-yeglu s yiɣes. Qqaren-d i wakken ad yiǧhid u ad yesɛu tabɣest (le courage) am yiɣes. Syin, deg leɛwayed n leqbayel, mi ara yaweḍ ugrud-a d aqcic, ad t-yawi baba-t ɣer ssuq i wakken ad t-issinen yimeddukkal-is u ad d-yawi, diɣ, aqerru. Aqerru ɣer leqbayel, meḥsub ad yili d aqerru n uxxam, ad yesɛu lḥir. Akken kan alamma yewweḍ 18 n yiseggasen deg leɛmer-is, ad yekcem ɣer tejmaɛt, ad d-yuɣal s wawal-is gar yimezdaɣ n taddart. Ihi, aḍar la iteddu s aẓar iseggasen-agi ineggura. Ayen yelhan, yelha, i as-yenna winna.

H. Moula