S yisem-a n “TV4“ i tettwassen s waṭas terga (chaine) tis rebɛa n tmaziɣt. Ass-a, ugar n sebɛa n yiseggasen segmi i d-tennulfa, yal yiwen amek i tt-yettwali d wamek i t-tejbed. Dɣa, ilmend n wayyur-a n remḍan i yekfan melmi kan, heggan-d yimḍebbren n terga-ya yiwen n wahil ara yeččaren uḍan n ɛawaz n wid yettwanasen lemri n tiliẓri. Yuɣ lḥal, ahat aṭas i yessaramen, ama d izeffanen (comédiens) neɣ d imferrǧen, lemmer zun tafarest (production) i d-yettilin meqrub remḍan, d usenɛet-nni, tecba winna n wussan nniḍen n useggas. Ma nuɣal-d ɣer yisura i d-iɛeddan deg remḍan, llan kra d inmettiyen (sociaux), llan kra d idelsanen, am wakken caḍen wid n unnecraḥ d taḍsa. Ma nemmeslay-d ɣef tedwilt n usewwi n wučči, ɣas tehwa i waṭas n tlawin, maca ɣur wiyaḍ ula d azwel-is « Chef di tkuzint » yewwi-d yili yettwaseggem ugar ɣer tezwawt. Tadwilt n « Azrar n wass » i d-ilemden ɣer tinna n « Xatem Sulayman », ur d-ferrnen isteqsiyen n yidles amatu i yeɛnan medden merra. Ɣer 20sr30, tettɛedday-d tezrart « Bergaz », ideg i d-iban amzun yebɣa umsufeɣ-is ad d-yeg « Axxam n Dda Meẓyan » akken nniḍen. Dima yuder uswir imi wid yetturaren ttmuqulen kan amek ad sseḍsen, tefra tfukk. Meqrub 21sr00, tella tettɛedday-d tedwilt « Tixeffet n unecraḥ » d ayen yettwassnen s « lkamira yeffren », am tinna daɣen n « Almi d tura ». Dɣa, aṭas n medden i yesḥassfen amek seg tama d targa n tmaziɣt, seg tama ɛerrḍen-d wid ukud ara mmeslayen s tutlayt tayeḍ. Ɣur kra daɣen, asaru n « Asirem » yebɛed akken ad d-yaweḍ « Tinifift » ideg tella tmaziɣt d ucebbeḥ n wawal xersum. Nesteqsa kra n medden ɣef waya imi nwala yal wa yesɛa tamuɣli. Nebda-tt sɣur yiwet n tmeṭṭut deg Ayt Smaɛel. «Mi ara terẓeḍ remḍan, ad tebɣuḍ ad twaliḍ ayen iwatan, nekk d « Bergaz » i yi-d-yettqabalen». I d-tenna s ubhat. Ulama tuget n wid yettwalin targa-ya d tulawin neɣ d timɣarin, maca llan daɣen ula d ilemẓiyen d yimɣaren i yeṭṭafaren targa i ten-id-yettlaɛin s tmeslayt-nsen. Dɣa, yiwen n yimferreǧ seg Bgayet yebra-d i waya: «Nella nettmeslay ɣef yimasriyen, tura atan nɛedda-ten deg wurar adday !».
Mhenni Khalifi