Accueil Tamazight Inelmaden sɣarayen iberraniyen

Tizi Uzzu

Inelmaden sɣarayen iberraniyen

1826

Deg temdint n Tizi Uzzu, aṭas n yimdanen i tt-id-ikecmen. Ad naf usan-d ama si tmurt n Mali neɣ Niğen ,isuriyen… Terra-ten-id tmara akken ad d-rewlen seg tmura–nsen : yal wa d acu i t-id-yewwin. Imezdaɣ n Tizi Uzzu , ttɛawanen-ten abeɛda ilmeẓẓyen. Ur ttwalin ara ansi d-usan , ttwalin-ten d imdanen yeḥwağen lemɛawna. Terza-d ɣur-sen lmeḥna , terẓa-ten ddunit, yerna mazal-iten meẓẓyit d igellilen. Sɛan azref am nutni am wiyaḍ imi d imdanen am nekni am nutni. Ad ten-tafeḍ s waṭas di ( la gare routière Bouhinoun), din i ttnejmaɛen, suturen tin n Rebbi, ttmetran win i asen-yefkan kra i wudem n Rebbi ad t-ṭṭfen. Ur ttakren, ur ttawḍen. Am wakka, dɣa, nufa yiwet n terbeɛt n yinelmaden n tseddawit Mulud At Mɛemmer, lemden deg tussna n tdamsa , fkan afus n tallelt d lemɛawna , imi i ten-ɣaḍen aṭas. Xedmen-asen tafelwit ɣummen-tt s tseddarit akken ur isefeḍ ara wayen ttarun ɣef tfelwit imi yekkat ugeffur. Selmaden-asen isekkilen akken ad issinen ad arun. Dayen yeswehmen imdanen. Fkan-asen afud i yinelmaden n Tizi Uzzu i ixeddmen i wudem n Rebbi, mačči d adrim i bɣan , ayen i ten-yessawḍen ɣer waya d lefhama d wul-nsen ḥninen, akken arrac –agi ur ttḥussun ara s temḥeqqranit. Sɛan izerfan-nsen ama d tamussni, ama d tujjya, ad dawin, ad ttekkin deg leqdic adelsan ayɣer ala ad uraren addal d wayen niḍen ? ul-nsen yeččur d asirem. Ahat imḍebbren n tmurt-nneɣ ad as-nefken tagnit akken ad kecmen ɣer yiɣerbazen imi d leqraya kan ara ten-yesukksen seg ṭṭlam n ddunit, akken qqaren imezwura , «ula i d-yexdem Remḍan, ula i d-texdem tẓallit, ḥala afus ireḥmen igellilen». Afud igerrzen i yinelmaden n Tizi Uzzu i yettalen iɣriben. Ahuddu aḥunnu fell-asen, akken i d-yenna umedyaz -nneɣ sliman Ʃazem ‘’D aɣrib d aberrani di tmura n medden, lweḥc u lemḥani d Rebbi i iraden’’.

Zakia Ben yahia