Ddurt-agi yezrin, Massa Nouria Benghebrit, taneγlaft n usegmi aγelnaw, texdem-d tirza γer lwilaya n Tizi Uzzu, i d-iḥaren amḍiq amezwaru i tekkelt tis 08 deg yikayaden n 03 yiswiren yemgaraden, 5 eme B.E.M d BAC anda i tessefqed γer deqs n yiγerbazen d isenfaren icudden γer uḥric n usegmi. Syin, teḥder i tmeγra meqqren i d-yettwahegan deg uxxam n umezgun Kateb Yasin n temdint n Tizi-Uzzu γef demma n yinelmaden i d-yufraren s yigemmaḍ yelhan di 03 n yikayaden n yiswiren yemgaraden 05 eme, BEM d BAC. Massa Nouria Benghebrit, terra tajmilt meqqren i yinelmaden yesεan talemmast n nnig n 18/20, anda i t-sseḥṛes akken ad xedmen igemmaḍ yelhan deg umecwar-nsen n leqraya imi tussna d tisura n tudert swayes i salayen lebni n tmura i teddun γer zdat u deg ubrid n unegmu. Syin, terra tajmilt i yimawlan n yinelmaden, iselmaden d imaswaḍen d twacult n ttrebga sumata i ibedden γer yidis n yinelmaden γef teγzi n yiseggasen. Imi igemmaḍ-agi, ussan-d s tebγest d laεtab n yal yiwen. Syin, tewwet-d s leqsaḥ γef wid yebγan ad hudden aḥric n ttrebga seg yiẓuran, wid i d-yessufγen isebtaren n ukayad n BAC imi imdanen-agi, cuban irebraben yebγan ad hudden tamurt, ɣef wakken i d-tenna tneɣlaft n ttrebga. Maca, Massa Nouria Benghebrit, muḥal teqbel tikkerkas, muḥal tebra i tella s sdat n yimesḥaf-agi, tquzzem-iten, tqubel-iten s lqed d tebγest. Syin, tefkka-d yiwet n tunḍict yelhan, anda i d-wekked d akken aselmed n tutlayt n tmaziγt ad tihriw deg unekcum aγurbiz 2016 / 2017 anda ara tennal 32 n lwilayat. Xas akken ur d-yettili ara uselmed deg merra n yiγarbazen n lwilayat-agi, maca ad fken akk ttawilat d walllalen i usnarni d uselmed n tutlayt n tmaziγt. Wagi d asurif meqqren I tgger tneγlaft n usegmi aγelnaw n tmurt n Lezzayer i usnerni n uswir.
Islam Bessaci