Ikhelouiène, d yiwet gar 23 n tuddar n tɣiwant n Ait Aissa Mimoun, i d-yezgan deg ugafa n tɣiwant-agi u deg ugafa n lwilaya n Tizi Uzzu, tebԑed ɣef temdint-a azal n 15 km.
Taddart-agi, mazal ar ass-a n wussan tedder aṭas n yiɣeblan d wuguren yecban: lgaz n temdint, tawenaḍt, imḍiqen n yilmeẓyen, Internet d uɣbel n waman… Imezdaɣ n taddart-agi, ctaqen ad wallin taqqudirt n waman tettuddum-d seg tberninin n uxxam-nsen, ula deg tallit n tegrest neɣ n cetwa. Uɣalen-asen waman am win yettrağğun agur n lԑid, melmi ara d-ilal. Imi ttɣaman 15 neɣ 20 n wussan i wakken ad d-uɣalen waman yiwen ubrid. D ayen yeğğan imezdaɣ n taddart-agi n Ikhelouiène, ad gren tiɣri i waṭas n yidisan teεna temsalt, gar-asen Axxam n tɣiwant n Ait Aissa Mimoun, takebanit n Lezzayer i Waman (ADE), d tkebanit n waman (L’hydraulique) n temdint n Tizi Uzzu. Acu kan am win iceṭḥen i uderɣal, ulɣuyen ur ğğin ara, lmaεna ulac. Lukan mačči d cwiṭ-a n waman i d-ttawin medden deg leԑwanṣer d tliwa, tili aṭas ara yemten i fad, am iɣersiwen, imɣan d isekla. Nnan-d imezdaɣ n taddart-agi: «Mačči d awezɣi i d-awen-d ḍleben, neɣ d aman 24h/24h neɣ ahat 7j/7j, maca nebɣa kan ad nseԑu aman am nekkni am tudrin-niḍen, daya kan i nebɣa a wid teԑna temsalt-a. Sugent-d a medden, aman s 10 wussan ar 15wussan i d-ttesrriḥen (tikwal ttelḥaqen 20 n wussan; akken ad serrḥen yiwet n tikkelt). Nebɣa kan aman tlata n tikal, neɣ xarsum snat i ddurt». Ugur n waman deg tmurt n Lezzayer d lmuḥal ad yekfu neɣ ad yefru; acku mačči d aman ur d-neɣli ara s xilla neɣ ulac aman deg yiɣezrawen d yisaffen, maca d afraq i ferqen ur nelli ara deg umkan-is.».
ADAOUN Abdelghani