Ttlata, 23 deg ɣuct
Tamurt d tamurt-ik a Bunadem. Akka i ixemmem Zidane mi akken i asen-d-yefka l’ambulance médicalisée ɣer Bouzeguène. ṭunubil-a, tusa-d s yiwem n’’Lsas Zidane’’ (Fondation Zidane) i ɣef yella d aqerru baba-s. Ula d Makhloufi yewwi-d snat n cciɛat i tmurt-is deg JO, xas ulamma yewwet-d s leqseḥ deg kra n yimḍebbren. Yugurten, daɣen, yuɣal-d ɣer Annaba deg yiwet n temlilit anda i d-mmeslayen fell-as akked umennuɣ-is d Ṛruman. Ma d Youcef yerza-d kan ɣer uxxam n La Dépêche de Kabylie anda i aɣ-d-yemmeslay ɣef umecwar-is n ccna d wuguren i d-yemmuger. Daymi ziɣ lhant tezlatin-is, d tidet i d-yeqqar.
Larebɛa, 24 deg ɣuct
Meqqar d MOB terbeḥ timlilit-is, ad turar demi-finale n telɣuɣa n CAF. Ahat deg tefriqt ulac amennuɣ deg yinurar, wammag dagi terwi tebberwi mi akka kksen ipulisen. Terwi ula deg l’AADL, waqila,tḍul tmezduɣt-is xas ulamma ferqen kra n yixammen. Ma Hakimi Farid, alɣuɣan n boxe anglaise deg tmurt n…Belgique, ad yurar yiwet n temlilit n uqesser kan akka, deg Tizi Uzzu.
Lerxmis, 25 deg ɣuct
Laqen 700 n yimelyan n yidinaren i ENIEM, aseggas-agi kan, i wakken ad txelleṣ ayen tettwalas. Aṭas ara yeffɣen lintrit. Iɣus lbiɛ n sselɛas, terwi-tt Ccinwa. Mazal la ttnadin tifrat. Ala tagi i yella d lluzin deg Tizi Uzzu ɣer tama n Cotitexn Draa Ben Khedda. Ala snat-agi i d-yettwaxelqen deg Tizi seg useggas n…1977 ar ass-a. Ula Kamel Tarwiht la yettwali amek ara yeffk afud i Berbère TV. Akka i aɣ-d-yenna mi akken i d-yerza ɣur-neɣ…
Sebt, 27 deg ɣuct
Ha-t-an ihi, yekfa stut ɣef BAC, ur telli tanga ara yettwakksen deg-s, ɣef wakken i d-tenna Massa Benghebrit. Wissen d acu ara as-d-afen, diɣ, iqennn-nni i yebɣan ad yeqqim lakul yeḥfa. I likan ad texdem sin n yiɣerbazen : yiwen i wid yettaẓen ɣer sdat ; wayeḍ i wid ‘’yettaẓen’’ ɣer deffir, mačči xir ?! Macahu, ɣef temgardt mi ara yers lmus, i tidet ma ad d-teffeɣ imi ! Ihi, cukkeɣ teffeɣ-d ɣer terbaɛt Machahou n tmezgunt n Iferhounène i yewwin arraz n Malek Bouguermouh deg Amizour.
Hocine Moula