Izimer yeswan gar 25 000 ar 65 000 n yidinaren, d ayen ur-iqebbel laεqel, imi ass am wass-a, axeddam azzayri, ur yezmir ara ad yelḥeq imman-is : yebra i tawsa maca ulac d acu i d-yeqḍa. Tewweḍ tfidi γer yiγes. Dayen i ideggren kra n yimdanen i wakken ad rewlen γef lbiε n lmal amecṭuḥ, aγelmi d umaεiz. Xelqen-d tirebbuyaε n 07 ar 09 n yimdanen, ttaγen-d igendyaz d tgendyaz. Dγa, nesteqsa kra n yimdanen i d-icurken aεejmi n lεid di temnaḍt n Wizgan, nnan-d :’’s 20 000 n yidinaren (02 n yimelyan n sentim), ad d-tawwiḍ gar 30 d 35 kilu n uksum, mebla ikruεen, dewwara d uqerru, maca ass-a ulac izimer yeswan 02 imelyan n sentim’’.
Si tama-nniḍen, nnan-d kra n yifellaḥen d akken d tidett lεelf n lmal ɣlay aṭas, maca times-agi iceεlen di leswaq n lmal d isemsaren i tt-iceεlen, d ayen yesḥissifen aṭas.
Dγa, yewwi-d lḥal γef tnaγlaft n tjara n tmurt-nneγ akken ad sḥarsen u ad gen tilas i wugur-agi n leγla i d-yettuγalen yal talit n leεwacar, xerṣum di lεid tameqrant, akken imdanen ad-sεeddin lεid di lehna d talwit.
Islam Bessaci