Gas tewɛer-as tegnit ayendin i umedyaz akken ad d-yessufeɣ isefra-s deg udlis i wid ara ten-yeɣren, maca ulac ayen iɣef ur iɛedda akken ad yagged ugur-a imezdi n usiẓreg (édition). D ameslay, da, ɣef wammud n umedyaz ameyyaz Mbarek Gamar iwumi yefka azwel n « 99 d asefru », i d-yessufeɣ s yidrimen-is ɣer teẓrigin Tamagit, ayyuren iɛeddan. D ammud-is iɣef i as-d-ɣlin yimeṭṭawen imi akken yufa abeddel deg tira d usenfali mačči akken i yemsefham akked umaẓrag. Mi ara nekcem deg tebḥirt n wammud n Dda Mbarek – deg yisebtar – ad aɣ-d-tmuger seg uwellih amezwaru rriḥa-nni n tutlayt tazwawt akked tmaziɣt tikwal. Deg-s ad ifiq yimeɣri s umeskar d win i yettferrsen yakan deg tutlayt n Lmulud At Mɛemmer, d win ijerrben aṭas n tlufa n ddunit, d win yeɣran daɣen ddeqs seg yiɣerbazen n usefru. Ɣef wawal n umeskar-is, ttuɣ acḥal-aya segmi ihegga wammud i usiẓreg, maca tuqin n teẓrigin d uẓuɣɣer-nsent, ǧǧan-t almi d aseggas-a akken i d-yeffeɣ. War ma nettu ɣef yisefra i d-yenna akked iqburen mi d-nnernan gar yiseggasen n sebɛin d 2000. Ma yella d imaynuten-nni ad d-ffɣen ɣer sdat deg wammud-is wis sin.
Yenna deg yiwen n usefru:
‘’Tegrem s lhedra aẓeṭṭa
Rwin lexyuḍ-is yexreb
Tẓerrem sswab d lɣelṭa
Uzlig tettwalim-t yesweb
Kunwi tɛecqem di ssmaṭa
Nekk leɛqel-iw d aseḥseb
Ma ɣur-wen awal d lfeṭṭa
Tasusmi ɣur-i d ddheb.’’
D ammud n tmussni d tirmit i ilaq ad iɣer kra n win i yettakken azal i wawal alqayan d yidles aɣlayan.
M. K.