Tuget n yinelmaden n tesnawiyin d yiɣerbazen ilemmasen Tizi Uzzu, ḥebsen ɣef ulmud n temsirin i wazal n ddurt. Imi seg wass-nni n lḥed 02/10/2016, ur uɣalen ara ɣer tneɣriyin-nsen n tɣuri, i wakken ad kemmlen aseddu n temsirin. Tamentilt akk n wanect-a d ulɣu-nni n yimuras i d-tefka tneɣlaft n usegmi taɣelnawt Massa Benghebriṭ ideg tekkes 5 n wussan i lfayda n yinelmaden. Acku deg yiseggasen yezrin, ttɣimin warrac deg yimuras n tegrest snat smant (15 wussan), gar taggara n buğamber d tazwara n yennayer. Ma d aseggas-agi, tefka-asen-d kan 10 wussan, imi ad d-fɣen ass n lexmis 22/12/2016, wa ad uɣalen ass n letnayen 02/01/2017. Maca inelmaden xelfen-as i wanecta s lekdub ur nesεi ara lsas, armi uɣalen umnen belli ur d-ttawin ara imuras n unebdu alama d 06/07/2017. Am wakken daɣen ara d-awin kan 10 wussan daɣen deg tefsut. Ɛlaḥsab n yisalen ineggura i d aɣ-d-yewwḍen seg tenmehla n usegmi n lwilaya n Tizi Uzzu, d akken ala ciṭ n ubeddel i yellan deg wussan n yimuras, imi d tidet deg wid n ccetwa ad awin kan 10 wussan, maca deg widak n umwan (wid n unbir) ad awin 7 wussan mačči 4 wussan, seg 27/10/2016 alamma d 02/11/2016. Daɣen widak n tefsut ad ten-awin i 15 wussan, ula d imuras imeqqranen, ad ten-awin deg lweqt-nsen, deg taggara n waggur n Mayyu. Aṭas n tesnawiyin n Tizi Uzzu i iḥuza uneḥbus-agi ɣef leqraya, gar-asent: tasnawit n Ssuq, tin Lxensa, Faḍma n Ssumer, tasnawit tamaynu…atg. D waṭas n yiɣerbazn ilemmasen ,yecban: Saεid Babuc, Saεid Derder… D ayen i d-yeglan s waṭas n tmesbaniyin d tikliwin deg tlemmast n temdit-agi. Am wakken daɣen ixedmen tirza ɣer tenmehla n usegmi n lwilaya n Tizi Uzzu i wakken ad as-siwḍen izen srid i unemhal n usegmi d tneɣlaft n usegmi. Ma d ayen akk yessewhamen deg wanect-a, imi tiddukliwin n yimawlan n yinelmaden n tesnawiyin-agi d tid n yiɣerbazen ilemmasen, ur d-girent ara afus-nsent adas-tiniḍ ur d ten-teεni ara taluft-agi n warraw-nsen yeqqimen ddurt ur ɣrin ara.
Adaoun Abdelghani