Accueil Tamazight Ad tili ass n 12 deg tuber 2016

Taɛacurt

Ad tili ass n 12 deg tuber 2016

2177

Leqbayel-nneɣ, am wakken uɣen tannumi yal ass n tɛacurt, ttmektin-d imeɣban, am lɛid, ur tettun ara amur-nsen , d tagnit anida sufuɣen lewɛadi, tẓurun lemqamat, deɛɛun s lxir. Amedya. Deg taddart n Wat Ṣellan i d-yezgan deg tɣiwant n Uqbil n Ʃin El Ḥemmam yal ass n lğemɛa uqbel taɛacurt s kra n wussan, zellum izgaren ttasen-d ɣer-sen ula seg tuddar-nniḍen. Deg-s sefraḥen igellilen, deg-s tasuta ad d-tettağa i tayeḍ ansayen , akken ur ten-tettun ara. Yella wanida sufuɣen ilufanen imaynuten i tikkelt tamezwarut. Ass n tɛacurt, d tagnit, daɣen, anida i d-ttemlilin iɛeggalen n tuddar mi ara xedmen timecreḍt-agi, qqaren-as daɣen lewziɛa, neɣ lwaɛda. Yerna mi ara ferqen aksum, ferqen-t ama i wid yesɛan, ama d wid ur nesɛi. Anamek-is, ulac amgired gar yimdanen. Qqaren awal timecreḍt, yekka-d seg wawal acraḍ, mi ara yecreḍ umdan akken ur tettḥazen ara waṭṭanen. Akken ula d timecreḍt s kra n win ad d-yefken adrim i tmecreḍt, yesibɛid Rebbi fell-as yir tignatin, tessebɛad tiwaɣiyin, i d-nnan. Ad naf, daɣen, tiwaculin deg Ʃin El Ḥemmam, ttawint-d lewɛadi ɣer uxxam n Ccix Muḥend d Jeddi Mengellat , imi xedmen zerda , ttdekiren awal n Rebbi. Maca neqsen wid yettẓuren, mačči am zik. Yessefk ad neṭṭef deg leɛwayed-nneɣ.

Zakia Ben Yahia