Tamsalmit n twermin(angine), tettḥaz ddeqs n yimeẓyanen, labeɛda di tallit n cctwa. Aya, ad t-ncudd ɣer lexṣas n tezmert n uḥareb di tfekka-nsen. D acu kan, ssebba n waṭṭan-a, d abirus ur nuklal ara ddeqs n ukukru. Tezmer, diɣ, ad tili ssebba-s d tabaktiritt i d-yeslalayen ddeqs n wuguren ɣer umeẓyan ma ur ttusejjint ara twermin-is akken ilaq. Ayen akk i itezzin ɣef waṭṭan-a, nessaram ad tafem deg umagrad-a, kunwi ay imeɣriyen-nneɣ
Amek i d-yettban lehlak-a ɣer yimeẓyanen?
S umata, tamsalmit n twermin tettban-d s tawla, anbeddal (talɣa d yinit) n twermin , d uqraḥ di lweqt n usebleɛ n yimetman.Tikkwal, llant kra n ccirat am uqraḥ n tɛdebbuḍt, tifidi deg uglim, ccirat n waṭṭan n turin d kra n yiwelsan di temgaṛt, yettefren neɣ i d-yettbegginen akken iwata lahlak-a.
Amek i d-tettban temsalmit n twermin s tbaktiritt?
S umata, tettḥaz win yesɛan gar 5 d 15 n yiseggasen. Tettbini-d s tawla yettɛeddin 38 n tṣeddarin, iwelsan qerṛiḥen di temgaṛt, ulac tusut, tiwermin beddunt-d d tizeggaɣin s umata, syin s teɣzi n lweqt, ad uqqlent d timellalin neɣ ad d-ilal deg-sent waṛṣeḍ, d ayen ara yessekkren lḥerǧ ɣer yimawlan akk d ṭṭbib akken ad idawi s lɛeǧǧlan amuḍin, imi talalit n waṛṣeḍ d ccira tameqqṛant d akken tabaktiritt telḥa di twermin.
D acu n wuguren i d-yeslalay ustehzi sdat n waṭṭan-a ?
Tamsalmit i d-yeslalay ubirus (adénovirus, virus Influenzae … atg), d tin i d-yettbanen deg ugar n 70% n tegnatin, u s umata tzerri war aɣilif ɣas ur tettusejji ara, imi tikkwal ula d tawla ur d-tgellu ara s yis-s. Acu kan, tamsalmit n tbaktiritt(streptocoque A), d aɣilif n yal amejjay, adawi-s ilaq ad yili s lɛeǧǧlan, imi tezmer ad d-teglu s ddeqs n wuguren ɣer yilemẓi am ṛṛumatizm n lemfaṣel, aṭṭan n tgeẓẓal, tikli n tbaktiritt ɣer ddeqs n yigmamen n umuḍin.
Taggara:
Tamsalmit n twermin ɣer imeẓyanin, d aɣilif ameqqṛan di tmurt-nneɣ, imi ar ass-a n wussan mazal ttbanen-d lehlakat id-tesseggra temsalmit-a, ɣef waya ilaq imawlan ur stahzayen ara sdat waṭṭan n twermin ma iban-d s arraw-nsen.
Salima Dali