Yuɣal-d usmel (forum) n tdukkliwin tidiganin n Ayt Smaɛel deg teẓrigt-is tis kraḍ (3). Ttiɛad yeḍra-d ihi ssebt-a iɛeddan deg uxxam n yilemẓiyen n tɣiwant, ideg kkint ugar n 8 n tdukkliwin, yal yiwet ɣef wacu i tesseḥbibir. Ma nwala ɣer yilindi, mi yemmug usmel-a deg wayyur n ɣuct, ad d-naf iɛeṭṭel win n useggas-a i d-yeɣlin deg unbir. I lmend n waya ihi, ddeqs n warmuden (activités) i d-yellan deg wass yekmel. Gar-asen isaragen ɣef usefrek n tdukkliwin, d leqdic n yilemẓiyen, sɣur Ɛisawi Ɛezdin seg tesdawit n Bgayet, Mass Salḥi Mulud, aselway n tdukkla Itri Adelsan n Uqbu, akked Fersawi Ɛebdelwahab, aselway n RAJ. Llan-d, daɣen, 3 n yiḥuna (ateliers) ɣef unneɛẓuẓi daxel tdukkla sɣur Merrar Yazid d aselmad, d Sadeq Rebbaɛi d anmazul n uselway n tɣiwant. Ɣef tneflit deg udrar, sɣur Ben Ɛeyyac Ṭaher, d aɛeggal deg tɣiwant n Draɛ Lgayed, yid Mass Mulwa. Akked uḥanu wis kraḍ, deg ṭṭabla n umciwer, ɣef wazal n tdukkla n yibabaten n warrac deg uɣerbaz, sɣur Rebbaɛi Racid, d amasay deg tesnawit n Ayt Smaɛel. Ddeqs n timsiknin ɣef yidles d umezruy, ladɣa, i d-yersen i uzayez, akked kra n tegnatin n waddal leǧwahi n tmeddit. Ayen yessefraḥen daɣen seg ttiɛad, d asɛeddi n yimuḍan, akked uɛeyyer ɣef waṭṭan n ssker sɣur yimejjayen i yimezdaɣ. Ad d-nesmekti kan belli iswi amezwaru n usmel-a n tdukkliwin, akken i d-nnan xilla n tikkal yimḍebbren n tɣiwant n Ayt Smaɛel, d asebɣes n tdukkliwin n temnaḍt-a tamsedrart ɣer ugar n leqdic deg unnar. Rnu-as tagnit i temlilit d umbaddal n tiktiwin gar yibujaden d wid yennumen amaḍal-a n uselḥu n tdukkla.
Kaisa Khalifi