Yella yiwen umdyaz iḥḥaṛ yiwet n teqcict, inna-as i yemma-s ɣur-m taqcict-agi ad tt-tefkeḍ ad teddu d tislit, teεjb-iyi-d ad tili d zzwaj-iw. Terra-as yemma-s n teqcict : yirbaḥ a mmi, kkes aɣbel ad ak-terju.
Ar taggara, seg iṛuḥ urgaz-nni ɣer lɣerba, yemma-s n teqcict-nni tɣemmeq tegzem-as amrar d sser, texdeε-it, tefka-tt i wayeḍ.Mi d-yusa si lɣerba umdyaz-nni yufa-d taqcict-nni deg uxxam-is tezwej. Yemma-s n teqcict-nni, yuɣal amzun mačči d win-a, ur tecliε ara akk deg-s. Ssyin iwwi asefru yenna-as:
Aql-i seddaw inijwel
Lmekla-w d tizwel
Idda-yi usennan weḥd-i
Bellak wi ittamnen tuǧǧel
D lqewm n teǧǧel
Mi as-nnan awal ad t-tefdi
Tefka-as-ten deg ufenǧal
Ad iṭṭes deg yinijel
Alamma ihdeṛ i Rebbi
Lḥan acu lḥan iwweḍ-d lweqt ad terbu teqcict-nni, tehlek ulac anda ur tt-wwin ara ur as-d-ufin ddwa. Yemma-s n teqcict temmekta-d amedyaz-nni, tenna-as, ahat, iḍefṛen-tt-id- d wul-is , ad ṛuḥeɣ ɣer-s, ad ḍelbeɣ deg-s ad d-yas, ad as-isemmaḥ, ahat ddwa ɣer-s i yella. Assen, yemma-s terǧa alammi iffeɣ urgaz n yelli-s, truḥ tessawel i umedyaz-nni. Iwweḍ-d, yaf-itt-id tettqliliḥ di tesga. Mi tt-iwala akken di liḥala-nni tɣaḍ-it nezzeh yenna-as:
Leɛmeṛ ur t-inqis ur t-irad
A tuzyint wer ttagad
Seg wul-im kkes ttexmim
Ay aḥnin ay ajewwad
A feteḥ muhab
Tekkseḍ i tuzyint leɣmim
Taṛwiḥt a tt-a di lḥisab
Taqcict tenneεtab
Yettkemmil…
Lasheb Ramdane