Lixsas deg lemḥadra d uḥareb n tjara mebla ttriḥ yessaweḍ almi i d-fɣen kra n yimdanen deg Leɛǧiba iwakken ad bedden zdat n uxxamn n tɣiwant anda ara d-beggnen lɣiḍ-nsen zdat unerni n tjara-agi i d-yesseglan s waṭas n yiɛewwiqen. Ɣef leḥsab n wayen i d-nnan kra n yimdanen-a, azniq-nsen yuɣal ibeddel udem s lketra n yimetjaren I d-yesrusun sselɛa-nsen mebla ma ḥudren ɣef tudert n yimezdaɣ. Deg wass, akken i d-qqaren, d ṭṭiq deg ubrid, tameddit d iḍumman I yettuzzuren deg lqaɛa, d ayen i d-yessawaḍen ama d iqejjan ama d iɣersiwen nniḍen ddawaren dinna. Lḥers-agi yeǧǧa imdanen ssutren ad ssiwḍen lɣiḍ-nsen deg tazwara i yimḍebbren terza taluft. D ayen dɣa i yeǧǧan aselway n tɣiwant yemmuger kra deg-sen anda yeḥḍer ula d imḍebber n yiǧadarmiyen. Ɣer taggara n temlilit, yettuɛeggen dakken ad d-yili useḥres ɣef wid yeffɣen i lqanun iwakken s kra n win yebɣan ad yili d amessenzi, iwulem fell-as ad d-yessewjed ayen ilaqen i lḥirfa-agi, rnu ad yexdem deg umkan yettuxeṣṣen i waya.
Smail. M