Taɣiwant n Tnebdar, d nettat ara yawin arraz i d-tettheggi tesqamut n lwilaya n Bgayet n temsizwert n tezdeg gar tɣiwanin n lwilaya. Aya d ayen i d-berreḥ lwali n Bgayet ddurt yezrin i tɣamsa imi d-yerza ɣer Sid Aich. Tettuɛeggen yiwet n Tmeɣra deg wussan i d-iteddun i tikci n warraz-agi .
Win ara yerzun, ass-a, ar tudrin n ṭɣiwant n tnebdar i teddun ɣer lɛerc At weɣlis metwal adrar Ukfadu, ad d-yawi ttbut ɣef waya, imi imezdaɣ n tudrin Tala Tagut , Iger Aɛmar , Tiɣezratin, Cbirdu, Tinebdar, sazedgen tudrin-nsen, fkan amedya di tezdeg, fkan-d tamsirt I wiyaḍ. Tidukliwin, xedment lḥemla-t n useɛlem i yimezdaɣ , tijemmuɛa n tudrin ur stahzant ara , yekfa uḍeggar n yiḍumman deg yiɣezrawen d yiberdan, fuken iqerɛunen deg yiberdan . Ula d imḍebbren n tɣiwant d yixeddamen-is ɣef uqerru-nsen, Mass Benaǧin Braham, xedmen tazmert-nsen, heggan imukan deg ara ttwajmaɛen yiresḍan, ikamyunen n usiweḍ n yiḍumman, rezzun ɣer tudrin deg lawan. Ttwaxedmen iqudas n waman n yizuliɣen, ttwaberzent tliwa ..atg . Nessaram, ad tuɣal tɣiwant n Tnebdar d amedya i tɣiwanin-nniḍen n Bgayet I wakken ad ḍefren deg ubrid-is.
B.Benhamouche