D lexsara tis 6 n terbaɛt n JSK. Seg wasmi i yuɣal Sofiane Hidoussi d asleɣmay, ala 8 ɣef 24 n yenqiḍin deg 8 temliliyin i d-tewwi tarbaɛt n Yilmeẓyen n leqbayel. Ayen i tt-yeǧǧan akka tura tezmert ad tsubb ɣer uswir wis 2 Mobilis.
Lexsara-agi n was-nni n lexmis akked USM Harrach, tkemmel uguren i JSK, ɣef wanect-a, dɣa, i yesṭaxer uselway n Yilmeẓyen n leqbayen, Hannachi asleɣmay Sofiane Hidoussi ass-nni n lǧemɛa. Hannachi i yenwan yufa-d asleɣmay i ilaqen i JSK ɣef wakken i d-yenna asmi i terbeḥ akked CSC. Yemmeslay-d ula ɣef tlata n yiswiyen i iga i terbaɛt-is. Amezwaru, yenna-d ad d-tuɣal tarbaɛt n JSK ɣer tqacuct n telɣuɣa. Iswi wis sin, d taqbuct n Lezzayer. Ma d wis tlata, d taqbucct n Tefriqt. Acu kan, ɣef wakken i yettban wurar n terbaɛt-is, ad yiwɛir ad ten-yaweḍ ma teqqim JSK akken tella akka tura. Dɣa, deg wussan-agi ara truḥ terbaɛt n JSK ɣer Liberia anda ara tqabel trabaɛt n Monrovia CB deg 1/32 n taggara n teqbuct n CAF. Mebla ma nettu timlilyin timeqqranini i tt-yettraǧun deg ussan i d-iteddun, am tarbaɛt ESS deg telɣuɣa neɣ MCA deg teqbuct n lezzayer. Ma nuɣal ɣer temlilin-a n JSK akked USM Harrach, ad naf ṭṭlima tameqqrant ur d-tekki ara sɣur asleɣmay Hidoussi, ɣef wakken i d-yenna. ‘’Mačči d nekk ara i ikecmen s annar i wakken ad leɛbel u ad d-awiɣ iswiyen. S kra n temlilyin i nexser, nexser-iten ɣef ssebba n leɣlaḍat n yimyurar. Ihi, mačči d nekk i ssebba n twaɣit’’, ɣef wakken iwala usleɣmay-agi. Acu kan, aselway n JSK, mačči s wudem-agi i iwala timsal, yerra kra din fell-as u yekker yexṭaxer-it xas ulamma yeẓra, llant temsal-nniḍen yugaren tigi. Acḥal aya tura i tugi terbaɛt n JSK ad d-terfed aqerru-s xas akken tewwi-d ussan kan kra n yimyuraren am Benaldjia, Zerguine, Izrghouf d Khellili, meɛna ur yuli ara uswir n lɛeb-is :d lexsara i yellan i yeqqimen. Ula d assaɣen gar usleɣmay Sfiane Hidoussi akked yimyurar-is, ur gerrzen ara. Yezga yettnaɣ akked kra seg-sen. Ayen yettaǧǧan aselway Hannachi ad yessekcem iman-is deg waṭas n temsal.
H.M.